ЕИ Эронга қарши янги санкциялар қачон кўриб чиқиши айтилди

Европа Иттифоқи мамлакатлари Ташқи ишлар вазирлари 29 январь куни Брюсселда ўтказиладиган учрашувда Эронга қарши янги санкциялар тўпламини муҳокама қилади. Бу ҳақда Европанинг “Politico” нашри икки Европа дипломатига асосланиб хабар берди. 

Уларнинг маълумотларига кўра, таклиф этилаётган рўйхат Европа Иттифоқининг инсон ҳуқуқларини бузганлик учун санкциялар режими доирасидаги 21 та бандни ўз ичига олади.  Бундан ташқари, Европа ташқи ишлар хизмати санкциялар рўйхатига учувчисиз учиш қурилмаларини ишлаб чиқариш билан боғлиқ 10 та бандни киритишни тавсия этмоқда. 

Нашрининг аниқлаштиршича, Теҳронга қарши чекловларни кучайтириш учун энг фаол равишда Германия, Франция ва Нидерландия ҳаракат қилмоқда. Бироқ, “Euractiv” портали хабар қилишича, Европа Иттифоқи Ислом инқилоби қўриқчилари корпусини Рим, Париж ва Мадриднинг қаршилиги туфайли террористик ташкилот деб эълон қилиш ниятида эмас. 

Илгари Европа Комиссияси раиси Урсула фон дер Ляйен ЕИнинг Эронга қарши санкцияларни янада кучайтириш эҳтимолини истисно этмаслигини айтган эди. 

Эронда норозилик намойишлари 2025 йил охиридан бери давом этмоқда. 29 декабрь куни риал курсининг кескин тушиши сабабли дўкон эгалари кўчага чиқди, эртаси куни уларга талабалар ҳам қўшилди. Кейинчалик тартибсизликлар Эроннинг барча вилоятларини қамраб олди. 2026 йил 2 январь куни кўчаларда қуролли гуруҳлар пайдо бўлди, ҳуқуқ-тартибот идоралари ходимлари билан тўқнашувлар кучайди, норозилик намойишларининг энг юқори чўққиси 8 январга тўғри келди. Эрон расмийлари босқинчиларни террорчилар деб атаб, Исроил ва АҚШни тартибсизликларни уюштирганликда айблади.