Япония аҳолиси 42 йил ичида илк бор 120 миллиондан камайди

Японияда аҳоли сони 42 йил ичида биринчи марта 120 миллиондан пастга тушди. Мамлакат фуқаролари сони жорий йил бошида 119,7 миллион кишини ташкил қилган. Бу ҳақда “Mainichi” хабар берди.

Маълумотларга кўра, жорий йил бошида Японияда япон фуқаролари сони ўтган йилга нисбатан 917 минг кишига камайган. Бу 1968 йилдан бери қайд этилган энг катта йиллик пасайиш ҳисобланади.

Аҳоли камайишининг асосий сабабларидан бири туғилиш даражасининг пасайиши бўлган. Мамлакатда бир йил давомида қарийб 670 минг чақалоқ туғилган бўлса, вафот этганлар сони 1,59 миллион кишига етган.

Шу билан бирга, Японияда хорижликлар сони ошиб бормоқда. Уларнинг сони бир йил ичида 354 минг кишига кўпайиб, рекорд даражадаги 4 миллион 31 минг нафарга етган.

Қайд этилишича, хорижий фуқаролар сони кетма-кет тўртинчи йил ошган. Бунга мамлакатда ишчи кучи етишмовчилиги сабаб чет эллик ишчиларни жалб қилиш сиёсати кучайтирилаётгани сабаб бўлмоқда. Хорижий аҳолининг асосий қисмини меҳнатга лаёқатли ёшдагилар ташкил этади. Уларнинг улуши 86,17 фоизга етган.

Япониянинг 47 та префектураси орасида фақат Токиода япон фуқаролари сони ўсган. Мамлакатнинг умумий аҳолиси, жумладан, хорижликлар билан бирга, 123,7 миллион кишини ташкил этган. Бу кўрсаткич ҳам ўтган йилга нисбатан қарийб 563 минг кишига камайган. Аҳоли сони фақат Токио, Чиба ва Осака префектураларида ошгани қайд этилган.

Эслатиб ўтамиз, 2025 йилда Япония аҳолисининг умумий сони 123 миллион кишини ташкил этган эди. Бу 2020 йилги кўрсаткич билан солиштирганда 3,09 миллион кишига кам дегани.