Янги тинчлик лойиҳаси Украина манфаатларига тўлиқ жавоб беради – Оқ уй

north_east

Урушни 1 кунда тугатишини айтган Трамп ваъдасини бажаришга яна уриниб кўряпти. Бу гал бирор натижа бўладими?

Украина делегацияси Женевадаги музокаралар якунлари бўйича тайёрланган тинчлик келишуви лойиҳаси Украина миллий манфаатларига тўлиқ мос келишини билдирган. Бу ҳақда Россия–Украина можаросини тўхтатиш бўйича АҚШнинг тинчлик режасига бағишланган Женева музокаралари якунлари бўйича Оқ уй эълон қилган баёнотда сўз боради.

Маълум қилинишича, АҚШ Давлат котиби Марко Рубио, Президент Дональд Трампнинг Яқин Шарқ бўйича махсус вакили Стив Уиткофф ва Президентнинг куёви Жаред Кушнер Украина делегацияси билан биргаликда тинчлик келишуви лойиҳаси матнини якуний кўриб чиққан.

Баёнотда таъкидланишича, учрашув конструктив ва самарали руҳда ўтган. Украинани ўйлантираётган барча асосий масалалар – хавфсизлик кафолатлари, узоқ муддатли иқтисодий ривожланиш, инфратузилмаларни ҳимоя қилиш, денгизда эркин сузиш ҳуқуқи ва сиёсий суверенитет – ҳар томонлама кўриб чиқилган.

Украина вакиллари киритилган ўзгартиришлар ва изоҳлардан кейингина ҳужжатнинг амалдаги версияси Украина миллий манфаатларини тўлиқ акс эттиришини, стратегик эҳтиёжларига жавоб беришини ва мамлакат хавфсизлигини таъминлаш учун ишончли, амалий механизмларни ўз ичига олишини тасдиқлагани айтилган.

Икки томон эришилган илгарилашдан мамнунлигини билдирган ва келишувни якунийлаштириш учун маслаҳатларни давом эттиришга келишиб олган.