Яна бир давлат USAID ходимларини мамлакатдан қувди

Зимбабве ҳукумати февраль ойида АҚШ Халқаро тараққиёт агентлигининг USAID демократия, инсон ҳуқуқлари ва бошқарувни баҳолашни назорат қилувчи гуруҳи ходимларини ҳайдаб чиқарди. Бу ҳақда кеча, 8 март куни АҚШ Давлат департаменти матбуот котиби Мэттью Миллер маълум қилди.

“Ўтган ой Зимбабве ҳукумати кутилмаганда мамлакатда ривожланиш ва бошқарувни баҳолаш бўйича USAID ходимлари ва пудратчиларни ҳибсга олиб, уларни депортация қилди”, деган Миллер.

Унинг сўзларига кўра, миссия ходимлари ғайриинсоний муомала, сўроқ ва таҳдидларга дуч келган. Миллер бундай ҳаракатларни асоссиз ва қўпол деб атаган. Унинг таъкидлашича, илгари Зимбабве расмийларининг риторикаси халқаро ҳамкорликни бошлаш ва демократик ислоҳотларни амалга ошириш истаги ҳақидаги баёнотларга асосланган эди. Бугун эса улар аксини бажармоқда.

"Биз АҚШ фуқароларининг хавфсизлигига жиддий қараймиз ва Зимбабве ҳукуматидан масъулиятли хатти-ҳаракатларни талаб қиламиз. Зимбабве халқи барча яхши нарсаларга лойиқдир ва биз масъулиятли сиёсий раҳбарлар ва ҳукумат институтларига эга бўлган янада инклюзив, демократик жамият қуриш йўлида ҳаракат қилишда уларни қўллаб-қувватлашда давом этамиз", деган АҚШнинг юқори мартабали дипломати.

Эслатиб ўтамиз, 2023 йилнинг ноябрь ойида Озарбайжон Президенти ёрдамчиси Ҳимат Ҳожиев мамлакатда ортиқ USAID учун жой йўқлигини айтган эди.