Волкановски Макгрегор билан жанг қилмоқчи

Австралиялик UFC жангчиси, енгил вазн тоифасида амалдаги UFC чемпиони Алекс Волкановски ирландиялик Конор Макгрегорга қарши октагонга чиқмоқчи. Бу ҳақда Волкановски “MMAJunkie”га берган интервьюсида айтиб ўтди.

“Мен учун Конор Макгрегор ҳақида гапириш жуда осон. Аввало мен мағлуб этган чемпионларни эслаш керак. Енгил вазн тоифасидаги барча чемпионларни мағлуб этдим. Мен енгил вазнда жанг қилмаган ягона чемпион бу Конор Макгрегор. У ўз вақтида ушбу вазнда энг яхши жангчилардан бири бўлган. Ишончим комилки, ҳозир ҳамма мен ва Конор ўртасидаги жангни кўришни хоҳлаяпти. Агар биз тўқнашувни ташкил қила олсак, бу UFC тарихидаги ўзига хос жанг бўларди”, дейди Волкановски.

Маълумот учун, Алекс Волкановски UFC'да умумий 25 та жанг ўтказиб, баҳсларнинг 23 тасида ғалабага эришган. 2 та жангда эса Алекс рақибларига имкониятни бой берган. Конор эса 28 марта октагонга чиқиб, 22 та баҳсда ғалаба эришган, 6 та жангда эса мағлубиятга учраган.

Эслатиб ўтамиз, аввалроқ ижтимоий тармоқларда UFC 229 да Ҳабиб билан жангдан кейин Конор Макгрегорнинг кийиниш хонасидан олинган тасвирлари пайдо бўлганди. Видеода Макгрегорни жуда тушкун ҳолатда кўриш мумкин. У, ҳатто, ҳис-туйғуларини жиловлай олмаган ва кўзларида ёш айланган. Ўшанда бу ирландиялик спортчи фаолиятидаги катта қулаш эди.