Венесуэла ҳудудий низони тинч йўл билан ҳал қилмоқчи – Мадуро

Венесуэла Гаяна билан ҳудудий низони тинч ва дипломатик йўл билан ҳал қилишга интилади. Бу ҳақда Венесуэла Президенти Николас Мадуро душанба куни “ Venezolana de Television ”  телеканалига маълум қилди.

Николас Мадуро 14 декабрь куни Кариб денгизидаги Сент-Винсент ва Гренадин ороллари штатида Гаяна Президенти Муҳаммад Ирфан Али билан музокаралар ташкил этиш ташаббусини юқори баҳолади. 

"Мен [Гаяна президенти билан] юзма-юз учрашувни Лотин Америкаси ва Кариб ҳавзаси учун катта ютуқ деб биламан. Биз бу ҳақда доим гапириб келганмиз, биз Венесуэла халқининг овози ва катта хоҳиш билан бу йўлдан бормоқдамиз.”, деди президент. 

Унинг таъкидлашича, Венесуэла "Гаяна ҳукумати ва Exxon Mobil компаниясининг ноқонуний қарорлари туфайли юзага келган можарони тинч дипломатик йўл билан ҳал қилишга интилади ва йўл кўрсатади".

Президент Лотин Америкаси ва Кариб ҳавзаси давлатлари ҳамжамиятига раислик қилувчи ва Кариб денгизи ҳамжамияти билан биргаликда олий даражадаги ҳамкорлик ҳамда Венесуэла ва Гаяна ўртасидаги ҳудудий низони ҳал қилиш бўйича музокаралар ташаббускори бўлган, Сент-Винсент ва Гренадинлар Бош вазири Ральф Гонсалвешга йўллаган мактубида миннатдорлик билдирган. 

Маълумот учун, 6 декабрь куни Венесуэла Миллий ассамблеяси (парламенти) маслаҳат референдуми натижаларига кўра, Венесуэла таркибидаги Гаяна  Эссекибони ҳимоя қилиш тўғрисидаги қонун лойиҳасини қабул қилди. Қонун лойиҳаси баҳсли ҳудудда 24-Гаяна  Эссекибо штатини яратишни назарда тутади. Шундан сўнг, Қўшма Штатлар Гаяна ҳарбийлари билан биргаликда ҳаво кучлари машғулотлари бошланганини эълон қилди.

Венесуэла ва Гаяна ўртасидаги  Эссекибо дарёсининг ғарбидаги 159,5 минг квадрат километрлик ҳудудга эгалик қилиш бўйича келишмовчилик 100 йилдан ортиқ давом этмоқда. Бу ҳудуд Гаянанинг учдан икки қисмидан кўпроғини ташкил қилади ва у ерда 283 минг киши истиқомат қилади. Ҳудудий низо 2015 йилда камида 10 миллиард баррел нефть бўлган конларнинг топилиши ва чегаралари аниқланмаган шельфда нефть қазиб олиш учун Гаяна томонидан Exxon Mobil'га консессия берилиши фонида кучайди.

Эслатиб ўтамиз, аввалроқ, Уруш арафасида бўлган Венесуэла ва Гаяна етакчилари учрашиши ҳақида маълум қилган эдик.