Бензинни энг арзон нархга пуллайдиган давлатлар қайси?

Дунёда Эрон, Ливия ва Венесуэла бензин нархи энг арзон ҳисобланган давлатлар сирасига киради. Бу ҳақда жорий йилнинг 25 ноябрь куни эълон қилинган “Global Petrol Prices” статистикасида келтирилган.

Статистикага кўра, дунё бўйлаб бензиннинг ўртача нархи 1 литр учун 1,24 АҚШ долларни ташкил қилади.

Қайд этилишича, турли мамлакатларда бензин нархларида сезиларли фарқ бор. Одатда, бой мамлакатларда нархлар юқори бўлса, қашшоқ мамлакатлар ва нефть ишлаб чиқарадиган ҳамда экспорт қилувчи мамлакатларда нархлар сезиларли даражада паст бўлади. Ягона истисно – бензин нархи паст бўлган иқтисодий ривожланган Америка Қўшма Штатлари. Турли мамлакатлардаги нархларнинг фарқи бензинга ҳар хил солиқлар ва субсидиялар билан боғлиқ. Барча мамлакатлар халқаро бозорларда бир хил нефть нархига эга, аммо улар турли солиқларни қўллайди. Натижада, бензин нархида ҳар хиллик юзага келади.

Global Petrol Prices'нинг сўнгги маълумотларида бензин энг арзон нархларда сотиладиган давлат сифатида Эрон пешқадам бўлмоқда. Эронда 1 литр бензиннинг нархи 0,02 долларга баҳоланади. Ливия ва Венесуэлада эса бензин 0,03 доллардан сотилади.

Бензинни энг қиммат нархга пуллайдиган давлатлар эса Ҳонгконг (3,30 доллар), Монако (2,23 доллар) ва Исландия (2,19 доллар) деб топилган.

Ўзбекистонда эса 1 литр бензиннинг нархи 0,99 доллар ва бу дунёдаги ўртача нарх сегментига тўғри келади. Марказий Осиёда бензин арзон сотиладиган давлатлар – Туркманистон (0,42 доллар) ҳамда Қозоғистон (0,49 доллар) бўлди. Тожикистонда бензин нархи қанча эканлиги ва унинг дунё рейтингидаги ўрни ҳақида маълумотлар келтирилмаган. Россияда эса 1 литр бензин нархи 0,57 долларни ташкил этади. Бензин нархининг ўзгариши кўп жиҳатдан ёнилғи солиғининг миллий тузилмалари ва субсидиялаш сиёсатидаги фарқлар билан изоҳланади.

Эслатиб ўтамиз, аввалроқ АI-95 бензини нархи энг паст бўлган давлатлар рўйхатида Туркманистон топ ўнталикка кириб, Марказий Осиё давлатлари ичида биринчи ўринни қайд этганди. Дунё бўйлаб энг арзон бензин нархи ҳам Эронда қайд этилганди.