Benzinni eng arzon narxga pullaydigan davlatlar qaysi?

Dunyoda Eron, Liviya va Venesuela benzin narxi eng arzon hisoblangan davlatlar sirasiga kiradi. Bu haqda joriy yilning 25 noyabr kuni e’lon qilingan “Global Petrol Prices” statistikasida keltirilgan.

Statistikaga ko‘ra, dunyo bo‘ylab benzinning o‘rtacha narxi 1 litr uchun 1,24 AQSH dollarni tashkil qiladi.

Qayd etilishicha, turli mamlakatlarda benzin narxlarida sezilarli farq bor. Odatda, boy mamlakatlarda narxlar yuqori bo‘lsa, qashshoq mamlakatlar va neft ishlab chiqaradigan hamda eksport qiluvchi mamlakatlarda narxlar sezilarli darajada past bo‘ladi. Yagona istisno – benzin narxi past bo‘lgan iqtisodiy rivojlangan Amerika Qo‘shma Shtatlari. Turli mamlakatlardagi narxlarning farqi benzinga har xil soliqlar va subsidiyalar bilan bog‘liq. Barcha mamlakatlar xalqaro bozorlarda bir xil neft narxiga ega, ammo ular turli soliqlarni qo‘llaydi. Natijada, benzin narxida har xillik yuzaga keladi.

Global Petrol Prices'ning so‘nggi ma’lumotlarida benzin eng arzon narxlarda sotiladigan davlat sifatida Eron peshqadam bo‘lmoqda. Eronda 1 litr benzinning narxi 0,02 dollarga baholanadi. Liviya va Venesuelada esa benzin 0,03 dollardan sotiladi.

Benzinni eng qimmat narxga pullaydigan davlatlar esa Hongkong (3,30 dollar), Monako (2,23 dollar) va Islandiya (2,19 dollar) deb topilgan.

O‘zbekistonda esa 1 litr benzinning narxi 0,99 dollar va bu dunyodagi o‘rtacha narx segmentiga to‘g‘ri keladi. Markaziy Osiyoda benzin arzon sotiladigan davlatlar – Turkmaniston (0,42 dollar) hamda Qozog‘iston (0,49 dollar) bo‘ldi. Tojikistonda benzin narxi qancha ekanligi va uning dunyo reytingidagi o‘rni haqida ma’lumotlar keltirilmagan. Rossiyada esa 1 litr benzin narxi 0,57 dollarni tashkil etadi. Benzin narxining o‘zgarishi ko‘p jihatdan yonilg‘i solig‘ining milliy tuzilmalari va subsidiyalash siyosatidagi farqlar bilan izohlanadi.

Eslatib o‘tamiz, avvalroq AI-95 benzini narxi eng past bo‘lgan davlatlar ro‘yxatida Turkmaniston top o‘ntalikka kirib, Markaziy Osiyo davlatlari ichida birinchi o‘rinni qayd etgandi. Dunyo bo‘ylab eng arzon benzin narxi ham Eronda qayd etilgandi.