Вашингтонда қулаган самолётнинг “қора қути”си топилди

Вашингтон шаҳридаги аэропорт яқинида ҳарбий вертолёт билан тўқнашиб кетган American Airlines авиакомпаниясининг йўловчи самолёти қулаган жойда бугун, 31 январь куни “қора қутилар” топилди. Бу ҳақда “Reuters” хабар берди.

Терговчилар вайроналар орасидан самолёт кабинасининг овоз ёзиш қурилмаси ва парвоз маълумотларини ёзиш мосламасини топди. Аэропортга яқинлашаётганда юз берган тўқнашувдан сўнг уч қисмга бўлинган самолёт ва бортида уч нафар аскар бўлган вертолёт Потомак дарёсига қулаган. Охирги маълумотларга кўра, 40 кишининг жасади сувдан олиб чиқилган.

Парвоз қайд қилувчи қурилмалар ҳалокатни текшираётган Миллий транспорт хавфсизлиги бошқармаси лабораториясига етказилди. У бир ой ичида дастлабки натижаларни эълон қилишга ваъда берди. Расмийлар авиаҳалокатга авиадиспетчерларнинг етишмаслиги билан боғлиқ бўлиши мумкинлигини тахмин қилмоқда.

Маълумот учун, 29 январь куни АҚШ пойтахтида Bombardier CRJ700 йўловчи самолёти қўниш вақтида Sikorsky H-60 (Black Hawk) ҳарбий вертолёти билан тўқнашиб, Потомак дарёсига қулаб тушди. Маҳаллий нашрларнинг American Airlines авиакомпаниясидаги манбаларига таяниб хабар қилишича, қулаб тушган самолёт бортида 60 нафар йўловчи бўлган. Кейинчалик компания экипаж таркибида ҳам тўрт киши бўлганини маълум қилган. АҚШ Федерал фуқаро авиацияси бошқармасига кўра, Bombardier CRJ700 йўловчи самолёти Канзас штатидаги Уичито шаҳридан Вашингтонга мунтазам рейсни амалга ошираётган бўлган. Кузатув камерасидан олинган видеода паст парвоз қилаётган самолётнинг Рональд Рейган номидаги аэропортга қўнишга уринаётгани, бошқа ҳаво кемаси билан тўқнашуви ва шундан сўнг портлаш юз бергани акс этган.

Расмий хабарга кўра, иккинчи ҳаво кемаси ҳарбий Sikorsky H-60 вертолёти бўлган. “Reuters” вертолёт бортида уч нафар ҳарбий бўлганини хабар қилмоқда. Рональд Рейган номидаги аэропорт Оқ уй ва Капитолийдан тахминан тўрт километр жанубда жойлашган. Потомак – кенглиги бир неча юз метр ва чуқурлиги бир неча метр бўлган йирик дарё. АҚШ Президенти Дональд Трамп қисқа баёнот билан чиқиб, ҳалокат ва қутқарув операцияси ҳақида барча маълумотларни олаётганини маълум қилди. CNN маълумотларига кўра, Потомак дарёсидаги сув ҳарорати ҳозирда Цельсий бўйича тахминан 1,6 даражани ташкил қилмоқда. Бундай совуқ сувда бўлиш уч дақиқа ичида оёқ-қўлларнинг ҳаракатчанлигини йўқотишига олиб келиши мумкин. Бундай шароитда сувдаги одамнинг омон қолиш имконияти 30 дақиқадан 1,5 соатгача давом этади.

Эслатиб ўтамиз, аввалроқ америкалик қутқарувчилар Вашингтондаги Рональд Рейган аэропорти яқинида American Airlines авиакомпаниясига тегишли самолёт ва ҳарбий Black Hawk вертолёти тўқнашуви оқибатида ҳалок бўлган 40 кишининг жасадини топганди. Ҳалок бўлганлар орасида 1994 йилги фигурали учиш бўйича жаҳон чемпионлари Вадим Наумов ва Евгения Шишкова, шунингдек, СССР чемпионатининг бронза совриндори Инна Волянская ҳам бўлган.