Фигурали учиш бўйича Жаҳон чемпионлари авиаҳалокатга учрагани айтилмоқда
Спорт
−
30 Январь
9809Фигурали учиш бўйича жуфтлик баҳсларида Жаҳон чемпиони бўлган Евгения Шишкова ва Вадим Наумов Вашингтонда ҳалокатга учраган самолётда бўлгани тахмин қилинмоқда. Бу ҳақда ТАСС хабар берди.
Манбага кўра, собиқ спортчилар фигурали учиш бўйича АҚШ чемпионати ўтказилган Уичитодан шу самолётда пойтахтга қайтган бўлиши мумкин. US Figure Skating ҳам кечқурун Вашингтонда вертолёт билан тўқнашиб кетган American Airlines рейси бортида ўз жамиятининг "бир нечта аъзолари" бўлганини тасдиқлади.
"Ушбу спортчилар, мураббийлар ва уларнинг оила аъзолари Канзас штатининг Уичито шаҳрида фигурали учиш бўйича АҚШ чемпионати билан биргаликда ўтказилган Миллий ривожланиш лагеридан уйга қайтаётган эди", дейилади расмий баёнотда.
Маълумот ўрнида, Шишкова ва Наумов СССР ва Россия терма жамоаси таркибида жуфтлик сифатида чиқиш қилган. 1994 йилда улар Жаҳон чемпионлигини қўлга киритган. Уларнинг ўғли Максим Наумов АҚШ терма жамоаси сафида чиқиш қилади, у бундан аввалги мусобақада 4-ўринни эгаллаган.
Эслатиб ўтамиз, кеча, 29 январь куни кечаси АҚШ пойтахти Вашингтон шаҳрида American Airlines авиакомпаниясининг Bombardier CRJ700 йўловчи самолёти Рональд Рейган аэропортида қўниш вақтида Sikorsky H-60 (Black Hawk) ҳарбий вертолёти билан тўқнашиб, Потомак дарёсига қулаб тушганди. Самолёт бортида 60 йўловчи ва тўрт экипаж аъзоси, вертолётда уч ҳарбий хизматчи бўлган. Иккала томон ҳам Потомак дарёсига тушиб кетганди. Воқеа жойида ишлаётган полиция ходимининг сўзларига кўра, 18 нафар ҳалок бўлганларнинг жасади сувдан чиқариб олинган.
LiveБарчаси