Ўзбекистонга ўқ-дори олиб ўтишга уринган туркиялик жазоланди

Самарқанд вилоятида божхона назоратидан жанговар ўқ-дори олиб ўтишга уринган Туркия фуқаросига ҳукм ўқилди. QALAMPIR.UZ суд ҳужжати билан танишди.

Қайд этилишича, 2000 йилда туғилган И.Ю. (эркак) “Turkish Airlines” авиакомпанияси экипаж аъзоси бўлган. У 2024 йил 19 ноябрь куни Туркиянинг Истанбул шаҳрида 1 дона “24 SAR P9” номли жанговар ўқ-дорини олиб, ўзининг қўл сумкасида сақлаб келган.

Эркак 2024 йил 24 ноябрь куни “Истанбул-Самарқанд” йўналиши бўйича ҳаракатланиб, Туркиядан Самарқанд шаҳрига келган ҳамда жанговар ўқ-дорини контрабанда йўли билан божхона назоратидан яшириб олиб ўтаётганида чегара божхона пости ходимлари томонидан тўхтатиб қолинган.

Жанговар ўқ-дори ашёвий далил тариқасида аниқланиб, тегишли тартибда ҳужжатлаштириб олинган. Суд-кимёвий экспертизаси 9 мм калибрли патрон жанговар ўқ-дори турига кириши, завод усулида ишлаб чиқарилгани ҳамда “Яргина” (Грач) ва “Глок” русумли қуролларда отиш учун яроқли экани ҳақида хулоса берган.

Эркак судда айбига тўлиқ иқрорлик билдирган ва 10 дона ўқ-дорини полигонда ишлатиш учун сотиб олганини, шундан бир донаси сумкасида қолиб кетганини, бундан бехабар бўлганини билдирган.

Суд ҳукми билан И.Ю. Жиноят кодексининг 246-моддаси 1-қисмида назарда тутилган жиноятни содир қилишда айбли деб топилган. Унга Жиноят кодексининг 57-моддаси қўлланиб, БҲМнинг 100 баравари миқдорида (37,5 млн сўм) жарима жазоси тайинланган.