Ўзбекистонда ёз мавсумида туризм тизими учун “Сиеста” жорий этилиши мумкин

Ўзбекистонда ёз мавсумида туризм соҳасини иқлим шароитларига мослаштириш ва сайёҳлар оқимини кўпайтириш мақсадида “Сиеста” тизимини жорий этилиши мумкин. Бу ҳақда Президентнинг “Туризм соҳасида иқлим шароитларига мослашиш ва ёз мавсумида сайёҳлар оқимини кўпайтириш учун “Сиеста” тизимини жорий этиш чора-тадбирлари тўғрисида”ги тегишли қарор лойиҳаси жамоатчилик муҳокамасига қўйилди.

Мазкур лойиҳага кўра, тизим тажриба-синов тариқасида ҳар йили 1 июндан 31 августгача Тошкент, Самарқанд, Бухоро ва Хива шаҳарларида амал қилади.

Муҳокамадаги ҳужжатда “Сиеста” тизими меҳмонхоналар, хостеллар, меҳмон уйлари, музейлар, тарихий-меъморий обидалар, ресторан ва кафелар, туроператор ҳамда турагентлар, шунингдек, сайёҳлар учун мўлжалланган кўнгилочар масканларга татбиқ этилиши белгиланмоқда.

Лойиҳада ёз ойларида туризм объектлари фаолиятини қуйидаги тавсия этилган иш тартиби асосида ташкил этиш кўзда тутилган:

• эрталабки иш вақти – 07:00 дан 13:00 гача;
• 13:00–17:00 оралиғида сиеста (танаффус);
• кечки иш вақти – 17:00 дан 23:00 гача.

Ҳужжатга кўра, танаффус вақтида корхоналар сайёҳлар ва ходимларнинг дам олиши учун шароит яратиши, кондиционер тизимлари, қабул хизмати ҳамда зарур навбатчи ходимлар фаолиятини таъминлаши лозим бўлади. Шунингдек, тизим жорий этилганда ходимларнинг иш ҳақи камайтирилмаслиги ва меҳнат шароитлари ёмонлаштирилмаслиги белгиланган.

Лойиҳада умумий овқатланиш корхоналарига кечки вақтга мослаштирилган махсус ёзги таомнома ва дастурларни ишлаб чиқиш, Маданий мерос агентлигига эса “Тунги музей” ҳамда “Кечки экскурсия” лойиҳаларини йўлга қўйиш тавсия этилган.

Бундан ташқари, Тошкент, Самарқанд, Бухоро ва Хива ҳокимликлари туристик ҳудудларда кечки ва тунги вақтда жамоат транспорти, ёритиш, ободонлаштириш ҳамда маданий-кўнгилочар тадбирларни ташкил этиши режалаштирилган.

Қарор лойиҳаси ҳозирда жамоатчилик муҳокамасига қўйилган бўлиб, муҳокама жорий йилнинг 25 июлига қадар давом этади.

Маълумот учун, “Сиеста” тизими – бу куннинг энг иссиқ пайтида бир неча соат дам олиш ёки ухлаш анъанасидир. Бу одат асосан иссиқ иқлимли мамлакатларда кенг тарқалган. Сиеста вақтида кўплаб дўконлар, офислар ва бошқа муассасалар вақтинча ёпилади. Ходимлар уйига бориб дам олиши, овқатланиши ёки қисқа муддат ухлаб олиши мумкин. Кечки пайт эса иш яна давом этади.

Эслатиб ўтамиз, аввалроқ Ўзбекистон ҳукумати банклар томонидан юридик ва жисмоний шахсларнинг ҳисобварақлари ҳамда омонатларига оид маълумотларни солиқ органларига тақдим этиш тартибини тасдиқлашни назарда тутувчи қарор лойиҳасини жамоатчилик муҳокамасига қўйган эди.