Ўзбекистонда ярим йил ичида наркотикка алоқадор 4 мингдан ортиқ киши ушланди

Жорий йилнинг биринчи ярим йиллигида Ўзбекистонда гиёҳвандлик ва психотроп моддаларнинг ноқонуний муомаласи билан боғлиқ жиноят содир этгани учун 4195 нафар шахс ушланди. Бу ҳақда АОКАда Ички ишлар вазирлиги раҳбарияти иштирокида бўлиб ўтган матбуот анжуманида маълум қилинди.

Қайд этилишича, қўлга олинганлардан 1 тонна 882 килограмм гиёҳвандлик воситалари ва 894 минг 255 дона кучли таъсир қилувчи дори воситалари топилган.

15 январь-15 февраль кунлари Тошкент шаҳрида “Хавфсиз ва соғлом пойтахт” профилактик ойлиги ўтказилган. 50 мингдан зиёд ўтказилган профилактик тадбирларга 2 миллиондан ортиқ фуқаро жалб этилиб, 838 минг донадан ортиқ махсус буклет ва флаерлар тарқатилган.

Шунингдек, 165 минг 998 нафар ўқувчи ва талаба билан якка тартибда профилактик суҳбат ўтказилиб, гиёҳвандлик ва психотроп моддаларнинг салбий оқибатлари тушунтирилган.

Тадбир давомида 801 та гиёҳвандлик ва психотроп моддаларнинг ноқонуний муомаласи билан боғлиқ ҳолат аниқланиб, 567 та жиноят ишлари қузғатилган, 158 та маъмурий тартибда чоралар кўрилган.

Ноқонуний муомаладан 21,8 килограмм гиёҳвандлик воситалари, 28,8 минг дона ва 26 килограмм миқдорда кучли таъсир қилувчи дори воситалари олинган. 

Қолаверса, гиёҳвандлик ва психотроп моддалар билан шуғулланувчи интернет наркодўконларнинг рекламаси акс этган 1 323 та “наркограффити”лар аниқланиб, ўчирилган ва уларни чизган 6 нафар шахс жавобгарликка тортилган. 

Ички ишлар органларига олиб келинган шахслардан 266 нафари мажбурий, 235 нафари ихтиёрий даволанишга ётқизилган.

Интернет ижтимоий тармоғи орқали наркотикларнинг савдоси билан шуғулланувчи шахсларни аниқлаш ҳамда фаолиятига чек қўйиш борасида тезкор-қидирув тадбирлари жадаллаштирилиб, 75 та “закладкачилар” билан боғлиқ ҳолатда 99 килограмм 627 грамм гиёҳвандлик воситалари олинган. 

Эслатиб ўтамиз, аввалроқ Тошкент вилоятида Telegram орқали гиёҳвандлик воситаларининг савдоси билан шуғулланиб келган 5 фуқаро қўлга олинганди.