Ўзбекистон ерлари чет элликларга сотиб юборилаяптими?

Сўнгги кунларда ижтимоий тармоқларда “Ўзбекистон ерлари чет элликларга бериб юборилаётгани ёки сотилаётгани” ҳақида хабарлар тарқалмоқда. Мазкур хабарлар юзасидан Кадастр агентлиги муносабат билдирди.

Қайд этилишича, ер участкаларини бериш (реализация қилиш) талаблари Ер кодекси билан белгиланган ҳамда унинг 17-моддасига мувофиқ чет эллик фуқаролар ва юридик шахслар, фуқаролиги бўлмаган шахслар, чет эл инвестициялари иштирокидаги корхоналар ер участкаларига фақат ижара ҳуқуқи асосида эга бўлиши мумкин. 

north_east

Навоийдаги 31 та кон хитойликларга сотилдими?

24-моддасига мувофиқ чет эл инвестициялари иштирокидаги корхоналарга, халқаро бирлашмалар ва ташкилотларга, чет эл жисмоний ва юридик шахсларига ер участкалари ижарага берилади.   

Шунингдек, “Қишлоқ хўжалигига мўлжалланмаган ер участкаларини хусусийлаштириш тўғрисида”ги қонунга мувофиқ чет эллик фуқаролар, фуқаролиги бўлмаган шахслар, чет эл юридик шахслари, чет эл инвестициялари иштирокидаги корхоналар, шунингдек, давлат органлари, муассасалари, корхоналари ва фуқароларнинг ўзини ўзи бошқариш органлари хусусийлаштириш субъектлари бўлмайди, яъни чет элликларга ер хусусийлаштириб берилмайди.

Бундан ташқари, қишлоқ хўжалиги ерларини ҳатто Ўзбекистон Республикасининг фуқаролари ҳам хусусийлаштириб ололмайди. 

“Шундай экан, ерларимиз чет эл фуқароларига бериб юбориляпти мазмунидаги хабарлар асоссиз ва охиригача ўрганилмасдан чиқарилган хабарлар. Шу ўринда фуқароларимиздан ҳар хил алдовларга учмасликларини, ижтимоий тармоқ фаолларидан эса ёлғон ва асоссиз хабарларни тарқатмасликни сўраб қоламиз. Зеро, охири ўйланмай қилинган юқоридаги каби ҳолатлар аҳолида норозилик, Қонунларга нисбатан ишончсизлик кайфиятини келтириб чиқариши ҳатто, инвестиция муҳитига салбий таъсир кўрсатиши мумкинлигини унутманг”, дейилади муносабатда.