Ўзбекистон Яқин Шарқдаги сулҳни олқишлади

Ўзбекистон Покистон раҳбарияти воситачилигида Яқин Шарқда ўт очишни тўлиқ тўхтатиш ва сулҳ ўрнатилиши эълон қилинганини олқишлайди. Бу ҳақда Ўзбекистон Ташқи ишлар вазирлиги баёнот берди.

“Мазкур саъй-ҳаракатларни кескинликни юмшатиш, сиёсий-дипломатик мулоқот ва ўзаро мақбул ечимларни топиш учун шароит яратиш йўлидаги муҳим қадам, деб биламиз.

Барча томонларни вазмин бўлишга, вазиятни яна кескинлашувига олиб келиши мумкин бўлган ҳаракатлардан тийилишга, шунингдек тинчлик ва барқарорликка эришиш мақсадида конструктив ҳамкорликни давом эттиришга чақирамиз”, дейилади баёнотда.

Шунингдек, ТИВ Ўзбекистоннинг можароларни фақат тинч йўл билан, Бирлашган Миллатлар Ташкилоти Низоми тамойилларига муфовиқ қатъий равишда ҳал этиш зарурлиги тўғрисидаги ўзгармас позициясини тасдиқлаган.

Кеча, 7 апрель куни АҚШ Президенти Дональд Трамп Эрон билан икки ҳафталик ўзаро ўт очишни тўхтатиш бўйича сулҳга эришилганини эълон қилди. Америка етакчисининг аниқлик киритишича, ушбу қарор Покистон Бош вазири Шаҳбоз Шарифнинг таклифи ҳамда “Эрон Ислом Республикасининг Ҳормуз бўғозини тўлиқ, зудлик билан ва хавфсиз тарзда очишга тайёрлиги” инобатга олинган ҳолда қабул қилинган. Эрон давлат телевидениесининг хабар беришича, Теҳрон ўт очишни тўхтатиш бўйича 10 та шартни илгари сурган ва АҚШ “уларга рози бўлишга мажбур бўлган”. Улар орасида ҳужум қилмаслик тамойили, Теҳроннинг Ҳормуз бўғози устидан назорати, Эрон ҳудудида уранни бойитиш, асосий ва иккиламчи санкцияларни бекор қилиш, товон пули тўлаш, Америка кучларини минтақадан олиб чиқиб кетиш каби шартлар бор. Шариф Эрон ва АҚШ делегацияларини “барча низоларни ҳал қилиш бўйича якуний келишувга эришиш” учун 10 апрель куни Исломободга музокаралар столига таклиф қилди. CNN телеканали хабарига кўра, Америка делегацияси таркибидан вице-президент Жей Ди Венс, президентнинг махсус элчиси Стив Уиткофф ва Трампнинг куёви Жаред Кушнер ўрин олади.