Ўзбекистон ва ЕИ сунъий йўлдош интернети бўйича келишув имзолади

Ўзбекистон Европа Иттифоқи томонидан молиялаштириладиган икки стратегик лойиҳа бўйича келишув имзолади. Бу ҳақда ЕИнинг Ўзбекистондаги ваколатхонаси хабар берди.

Қайд этилишича, Ўзбекистон ва Европа Иттифоқи ўртасидаги мустаҳкам ҳамкорлик Халқаро ҳамкорлик бўйича комиссар Жозеф Сикела ташрифи давомида янада чуқурлашган ва бунда Global Gateway – Глобал Дарвоза стратегиясига улкан эътибор қаратилган. Ташриф давомида рақамли ўзаро алоқадорликни кенгайтириш, барқарорликни ривожлантириш ва муҳим хомашё орқали иш ўринлари яратиш ҳамда Транскаспий транспорт йўлагини ривожлантириш орқали савдони ошириш масалаларига урғу берилган. Шунингдек, Глобал Дарвозанинг инфратузилма ва тоза энергия ечимларини қўллаб-қувватлашдаги ўрни ҳам муҳокама қилинган. 

“Марказий Осиёда рақамли ўзаро алоқадорликни ривожлантириш бўйича Европа жамоаси ташаббуси” доирасида комиссар Сикела Европа Иттифоқи томонидан молиялаштириладиган икки стратегик лойиҳа бўйича келишувларнинг имзоланишига гувоҳ бўлган.

“Марказий Осиё учун алоқа (C4CA) лойиҳаси” – ушбу лойиҳа бутун минтақада рақамли инфратузилма ва интеграцияни яхшилашга қаратилган. У Марказий Осиё мамлакатларини яхшироқ боғлашга, ҳамкорлик ва иқтисодий алмашинувни ривожлантиришга хизмат қилади. Рақамли интеграцияни ошириш орқали лойиҳа иқтисодий ўсишни қўллаб-қувватлайди, онлайн хизматлардан фойдаланиш имкониятларини яхшилайди ҳамда минтақадаги рақамли тафовутни бартараф этишга ёрдам беради.

“Марказий Осиёнинг олис ҳудудлари аҳолиси учун сунъий йўлдош алоқаси” лойиҳаси – ушбу ташаббус чекка ва олис ҳудудларни юқори тезликдаги интернет билан таъминлашга қаратилган. Бу лойиҳа интернетга ишончли кириш имконияти чекланган ёки умуман мавжуд бўлмаган қишлоқ ва олис ҳудудлар аҳолиси учун таълим, соғлиқни сақлаш ва иқтисодий ривожланиш соҳаларида рақамли имкониятларни кенгайтиришга хизмат қилади. Лойиҳа Европа Иттифоқининг инклюзив рақамли алоқани ривожлантириш бўйича кенг қамровли мақсадларига мос келиб, барча фуқароларнинг муҳим хизматларга эга бўлиш имкониятини таъминлаш ҳамда рақамли иқтисодиётда иштирок этишига ёрдам беради.

“Европа Иттифоқи ва Ўзбекистон бутун Марказий Осиё бўйлаб интернет алоқасини яхшилаш йўлида биргаликда ишламоқда. Европа технологиялари ва Ўзбекистонинг тажрибаси кўпроқ одамларга тезкор ва хавфсиз интернетдан фойдаланиш имкониятини яратади, бизнесларни қўллаб-қувватлаб, янги иш ўринларини яратади ҳамда маҳаллий жамоалар учун яшаш шароитларини яхшилайди. Рақамли алоқага сармоя киритиш орқали биз бўшлиқларни тўлдирмоқдамиз, имкониятлар яратмоқдамиз ва Марказий Осиё минтақасининг рақамли иқтисодиётдан тўлиқ фойда олишини таъминламоқдамиз”, дейди комиссар Сикела.

Шунингдек, Сикела Олмалиқ тоғ-конь металлургия комбинатига ташриф буюриб, барқарор ресурсларни ривожлантириш ва муҳим хомашё соҳасида масъулиятли инвестициялар имкониятларини ўрганган.

“Глобал Дарвоза стратегияси рақамли, энергетика ва транспорт соҳаларида барқарор алоқаларни мустаҳкамлаш ҳамда таълим ва тадқиқот тизимларини ривожлантириш орқали жаҳон инвестиция бўшлиқларини бартараф этишга қаратилган Европа Иттифоқининг содиқлигини намоён этади. 2021–2027 йиллар оралиғида мазкур ташаббус доирасида 300 миллиард евро миқдорида давлат ва хусусий инвестицияларни жалб қилиш кўзда тутилган бўлиб, бу глобал барқарор ўсиш ва мустаҳкам ҳамкорликни ривожлантиришга хизмат қилади”, дейилади хабарда.

Эслатиб ўтамиз, аввалроқ Жозеф Сикела Ўзбекистонга ташриф буюргани хабар қилинганди. Кейинроқ, Ўзбекистон Республикаси Президенти Шавкат Мирзиёев мамлакатда амалий ташриф билан бўлиб турган Жозеф Сикела бошчилигидаги делегацияни қабул қилганди. Суҳбатда Ўзбекистон билан Европа Иттифоқи ўртасидаги кўп қиррали муносабатларни янада ривожлантиришнинг долзарб масалалари муҳокама қилинган.