“Ўзбекистон учун шармандали вазият бошқа давом этиши мумкин эмас” – Каримованинг адвокати яна Тошкентга келди

Жамият 13808
image

Женевадаги Mangeat Attorneys at Law адвокатлик идораси эгаси ва раҳбари Грегуар Манжа яна Тошкентга келди. Адвокат мижози Ўзбекистон Республикасининг Биринчи Президенти Ислом Каримовнинг тўнғич қизи Гулнора Каримова билан учрашиш учун Зангиотадаги маҳбуслар колониясига борди.

“Зангиотага келганимга деярли икки соат бўлди. Ҳамон кўришиш учун кутяпман”, деган Грегуар Манжа Twitter`даги саҳифасида.

Адвокат бундан бир неча кун илгари ёзиб қолдирган твитида Тошкентга бориши ва мижозининг ўзбошимчалик билан ҳибсда сақланишига барҳам беришга ҳаракат қилишини ёзиб қолдирган.

“Келаси ҳафтада Гулнора Каримованинг ўзбошимчалик билан ҳибсда сақланишига чек қўйишга ва унинг доимий равишда нормал тиббий ёрдам олишини таъминлаш учун Тошкентга, Зангиота колониясига қайтаман. Ўзбекистон учун шармандали ҳисобланган бу вазият бошқа давом этиши мумкин эмас”, деб ёзган Манжа.

Аввалроқ, швейцариялик адвокат мижозига тиббий ёрдам кўрсатилмаётгани ва унга руҳий босим ўтказилаётгани ҳақида маълум қилганди. Аммо Ўзбекистон Республикаси Бош прокуратураси ушбу хабарларни рад қилди ва Гулнора Каримованинг аҳволи қониқарли эканини таъкидлади.

Эслатиб ўтамиз, Гулнора Каримова 5 март куни ўз уйида ҳибсга олиниб, жазони ўташ учун умумий тартибли колонияга олиб кетилганди.

Каримова жазони ўташ тартиби ва шартларини қасддан бузганлиги сабабли жиноят-ижроия қонунчилигига мувофиқ, Ўзбекистон Республикаси ИИВ Жазони ижро этиш бош бошқармаси ҳузуридаги Пробация хизматининг тақдимномасига асосан, жиноят ишлари бўйича Яшнобод тумани суди томонидан унга нисбатан тайинланган жазонинг ўталмай қолган муддати озодликдан маҳрум қилиш жазоси билан алмаштирилиб, умумий тартибли колонияда ўташи белгиланган.

Суннатилла Абдуллаев
Мақолага баҳо беринг
Баҳолаганлар: 346
Рейтинг: 2.9
t
×
×