Ўзбекистон Россиядан олаётган газ ҳажмини 4 баравар оширмоқчи – ОАВ

Ўзбекистон Россиядан газ етказиб бериш ҳажмини деярли тўрт баравар оширмоқчи. Амалдаги шартномада кунига 9 миллион куб метр газ олиш назарда тутилган бўлса, эндиликда уни 32 миллионга ошириш режалаштирилмоқда. Бу ҳақда ўзи танишиб чиққан ҳужжатларга таяниб, “Ведомости” нашри хабар берди. 

Қайд этилишича, 2024-2030 йилларда шимолдан магистраль газ қувурлари тизимини модернизация қилиш ҳисобига насос ҳажмини ошириш режалаштирилган, бунинг учун 500 миллион доллар йўналтирилади. 

“Ўзбекистонга Россиядан газ етказиб бериш бўйича шартнома 2023 йил июнь ойида тузилган эди. Илгари уни мамлакатнинг ўзи ишлаб чиқарган ва экспорт қилган, шу жумладан Хитой ва Россияга ҳам”, дейилади хабарда.

“Ведомости”нинг таъкидлашича, Ўзбекистон “Газпром”га 2020 йилгача газ етказиб берган. Масалан, 2019 йилда 4,9 миллиард кубометр сотилган, аммо кейинчалик газ етишмаслигига дуч келинган.

Келишувларга кўра, Ўзбекистонга етказиб бериш октябрь ойида бошланган, газнинг суткалик ҳажми 9 миллион куб метрни ташкил қилади, йиллик эса тахминан 2,8 миллиард куб метр. Агар етказиб бериш кунига 32 миллион куб метргача ошса, йиллик ҳажми 11,68 миллиард кубометрни ташкил қилади. 

“Газпром” раҳбари Алексей Миллер 2023 йил декабрь ойида Ўзбекистонга газ етказиб бериш имзоланган шартнома бўйича кунлик мажбуриятларга нисбатан икки баравар оширилганини маълум қилган. 

“Шундай қилиб, республика “Марказий Осиё – Марказ” газ қувури орқали етказиб берилиши мумкин бўлган техник жиҳатдан мумкин бўлган максимал газ ҳажмини олди”, дейди Миллер.

Эслатиб ўтамиз, “Газпром” 2024 йилнинг ёзида бўладиган Санкт-Петербург халқаро иқтисодий форумида Қирғизистон, Қозоғистон ва Ўзбекистон билан газ етказиб бериш бўйича янги шартнома тузишни режалаштираётгани хабар қилинганди.