Ўзбекистон паспорти жаҳон рейтингида 5 поғона кўтарилди

Henley & Partners компанияси паспортлар индексининг 2026 йилги янгиланган рейтингни эълон қилди. Рейтинг Халқаро ҳаво транспорти ассоциацияси (IATA) маълумотлари асосида тузилган бўлиб, юздан ортиқ давлат паспортларини қамраб олади.

Унга кўра, Ўзбекистон индексда 75-ўринни эгаллади ва бу позицияни Қирғизистон билан бўлишди. Ўзбекистон паспорти эгалари 61 та давлатга визасиз ташриф буюриши мумкин. 2025 йилда Ўзбекистон ушбу рейтингда 80-ўринда бўлган.

Қозоғистон 61-ўринда қайд этилди – ушбу мамлакат фуқаролари 78 та давлатга визасиз кира олади ва бу минтақадаги энг “кучли” паспорт ҳисобланади. Тожикистон 81-ўринни (54 йўналиш), Туркманистон эса 87-ўринни (47 йўналиш) эгаллади.

Рейтинг етакчилари сифатида Сингапур (192 та давлат), Япония ва Жанубий Корея (ҳар бири 188 та давлат) ўрин олган.

Маълумот учун, Henley & Partners паспортлар индекси – бу фуқароларга тақдим этиладиган ҳаракатланиш эркинлиги даражасига кўра давлатларни тартибловчи халқаро рейтингдир. Индекс турли мамлакат ва ҳудудларнинг виза қоидаларини таҳлил қилади ҳамда паспорт эгалари визасиз ёки келганда виза олиш орқали кириши мумкин бўлган давлатлар сонига қараб рейтинг тузади. Мамлакатнинг рейтингдаги ўрни унинг фуқаролари олдиндан виза расмийлаштирмасдан кириши мумкин бўлган давлатлар сони билан белгиланади.

Эслатиб ўтамиз, аввалроқ Иқтисодиёт ва тинчлик институти (Institute for Economics & Peace, IEP) мамлакатларнинг хавфсизлик ва тинчлик даражасини баҳоловчи Global Peace Index 2025 рейтингини эълон қилганди. Ўзбекистон ўтган йилгидан 2 поғона кўтарилган ва умумий рейтингда 64-ўринни эгаллаган.