Ўзбекистон муфтийси мусулмон олами учун муҳим таклифларни ўртага ташлади

Бугун мўмин-мусулмонлар иттифоқлиги ҳар қачонгидан ҳам жуда муҳим бўлмоқда. Қуръони каримнинг бир неча оятларида Ислом умматини бирлашишга чақиради. Бу ҳақда Ўзбекистон мусулмонлари идораси раиси – муфтий Нуриддин Холиқназаров кеча, 15 апрель куни Истанбул шаҳрида бўлиб ўтган Туркий давлатлар диний идоралари раҳбарларининг I йиғилишида сўзлаган нутқида гапирди. 

Муфтий бир қатор таклифларни илгари сурди: 

Туркий давлатлар диний идоралариаро Фатво ҳайъатини ташкил этиш

“Биринчи, халқларимизнинг урф-одати, ҳаёт тарзи азалдан муштарак бўлган. Шу боис, бугунги глобаллашув ва таҳдидлар зўрайган даврда мўмин-мусулмонлар эътиқодий бирлигини таъминлаш ҳамда иттифоқлигини мустаҳкамлаш мақсадида, Туркий давлатлар диний идоралариаро Фатво ҳайъатини ташкил этишни таклиф этамиз.

Охирги 5 йилда Ўзбекистон, Қозоғистон ва Қирғизистон уламолари билан Рамазон ойи, Ийдул Фитр ва Ийдул Азҳонинг биринчи куни, намоз вақтларини аниқлаш ҳамда замонавий шаръий масалаларда фатво ишлаб чиқишдаги ҳамкорлигимиз ўзининг ижобий самарасини бермоқда.

Мазкур Фатво ҳайъатини ташкил этиш орқали ушбу ишларнинг фаолият кўлами ва жўғрофияси янада кенгайиб, туркий халқлар ҳамжиҳатлигини оширишга эришилади, инша Аллоҳ”, дейди Ўзбекистон мусулмонлари раҳбари.

Туркий давлатлар уламоларининг Форумини ўтказиш

“Иккинчи, ҳозирги мураккаб замонда Имом Мотуридий ақидавий таълимотларининг нақадар пухталиги ва Ҳанафий мазҳабининг шаръий масалалари ниҳоятда халқчил эканини англаб етилмоқда. Аллоҳга шукрки, қадимдан туркий халқларимиз ақидада Имом Мотуридий йўналишига, фиқҳда Абу Ҳанифа мазҳабига эргашадилар.

Ақидамиз ва мазҳабимизга турли томондан таҳдидлар бўлаётган бир паллада Имом Мотуридий ва Ҳанафий мазҳаби таълимотларини халқларимиз онгу-шуурига чуқур сингдириш мақсадида, ҳар йили бир марта Имом Мотуридий таълимотларини тадқиқ этиш ва кенг ёйишга бағишланган Туркий давлатлар уламоларининг Форумини ўтказиш, шунингдек, йилда бир марта Ҳанафий мазҳаби мўътадиллигини кенг тараннум этадиган Туркий давлатлар уламолари Симпозиумини ўтказишни таклиф этамиз.

Фурсатдан фойдаланиб, Имом Мотуридий таълимотларини тадқиқ этишга бағишланган биринчи Туркий давлатлар уламолари Форумини ушбу аллома туғилиб, ижод этган Самарқанд заминида ташкил этиш таклифини тақдим этамиз”, дейди муфтий.

Нодир асарларни таржима қилиш

Учинчи таклифида Нуриддин Холиқназаров Ўзбекистонда Ислом цивилизацияси маркази ва Имом Бухорий, Имом Термизий ҳамда Имом Мотуридий халқаро илмий марказлар ташкил этилиб, ислом уламолари асарларини тадқиқ этиш ишлари йўлга қўйилганини урғулаган. Бундай ишлар қардош давлатларда ҳам олиб борилаётганидан хабари борлигини айтган ҳолда, тадқиқ этилган нодир ва ноёб асарларни қардош тилларга ҳам таржима қилиш ва мўмин-мусулмонларга етказиш каби илмий лойиҳаларни амалга оширишни таклиф этган.

Диний кадрларни касб-маҳоратларини ошириш

“Тўртинчи, сўзга чиққан нотиқлар қайд этганларидан маълум бўлмоқдаки, бугунги глобаллашув даврида диний соҳа ходимларининг масъулияти янада ошиб бормоқда. Шу боис, диний кадрларни касб-маҳоратларини ошириш борасида ҳам соҳа ходимларининг тажриба алмашишларини жорий этиш яхши натижаларни беради”, дейди Ўзбекистон муфтийси.

Йиғилишда Туркия диёнат ишлари бошқармаси раиси Али Эрбош амалий ва долзарб аҳамиятга эга бўлган таклифлар учун миннатдорлик билдириб, уларни тадбиқ этиш борасида барча саъй-ҳаракатларни амалга оширишга тайёр эканини маълум қилган.