Ўзбекистонлик эркак Истанбул аэропорти масжидида ўғирлик содир этди (видео)

Туркиянинг Истанбул халқаро аэропорти намозхонасида ўзбекистонлик эркак ўғирлик содир этди. Ушбу ҳолат аэропортга ўрнатилган кузатув камераларига тушиб қолган ва маҳаллий оммавий ахборот воситалари томонидан тарқатилмоқда. 

Воқеа жорий йилнинг 4 август куни содир бўлган. 

Қайд этилишича, шу куни ўзбекистонлик Б.М. ва унинг дўсти терминалдаги масжидга кирган. Айни шу вақтда масжидда бир неча киши ухлаб ётган эди. Б.М. ухлаётган эркаклардан бирининг сумкасини олиб, уни дўстининг ёнига олиб борган ва сумкадаги пулларни чўнтагига солиб, сумкани яна ухлаётган кишининг боши томонга қўйиб қайтган. Шу тариқа у ўмарган пулларини масжид таҳоратхонасига кириб, санаб чиққан. Буларнинг ҳаммаси кузатув камераси хотирасида акс этган. 

Сумкасидаги пул ўғирланганини пайқаган йўловчи ҳолат ҳақида зудлик билан полицияга хабар берган. Бу вақтда эса ўзбекистонлик Б.М. ва унинг дўсти ҳали аэропортни тарк этмаган эди. Улар аэропортдан чиқиб кетаётганда қўлга олинган. 

Полиция бўлимида баённома расмийлаштирилиб, Б.М. қамоққа олинган.