Ўлдирилган Ларижонийга дарҳол ўринбосар топилди – Ароқчи

Эрон Ташқи ишлар вазири Аббос Ароқчи Миллий хавфсизлик олий кенгашининг ўлдирилган котиби Али Ларижонийга “зудлик билан ўринбосар топилганини” маълум қилди. Бу ҳақда у “Al Jazeera” телеканалига берган интервьюсида сўз очди.

Унинг айтишича, Эроннинг сиёсий тизими барқарор ва алоҳида шахсларга боғлиқ эмас.

“Америкаликлар ва исроилликлар нега ҳалигача бу жиҳатни тушунишмаётганини билмайман: Эрон Ислом Республикаси шаклланган сиёсий, иқтисодий ва ижтимоий институтларга эга кучли сиёсий тузилмага эга”, дейди Аббос Ароқчи.

Унинг сўзларига кўра, бир инсоннинг борлиги ёки йўқлиги бу тузилмага таъсир қилмайди. У мамлакатнинг марҳум олий раҳнамоси Оятуллоҳ Али Хоманаий ўлдирилганига қарамай, тизим ўз мавжудлигини давом эттирганини қайд этган.

Аббос Ароқчи, шунингдек, Теҳрон воситачиларнинг урушни тўхтатиш бўйича таклифларини тинглашга тайёрлигини қўшимча қилган.

“Агар урушни тўхтатиш бўйича бизнинг шартларимизга мос келадиган таклиф бўлса... ва Эрон кўрган зарар қопланса, биз уни албатта тинглаймиз. Биз ўт очишни тўхтатишга (вақтинчалик сулҳга) ишонмаймиз. Биз урушнинг тугашига ишонамиз. Урушнинг тугаши эса айнан шуни – барча фронтларда урушнинг тўхташини англатади”, дейди у.

Эслатиб ўтамиз, аввалроқ Исроил зарбаси оқибатида Эрон Миллий хавфсизлик олий кенгаши котиби Али Ларижоний ҳалок бўлганди. У билан бирга ўғли – Муртазо ва қўриқлаш хизмати бошлиғи Алиризо Баят ҳам ўлдирилган. Теҳрон бунга жавобан Исроилга қарши янги ҳужумлар тўлқинини эълон қилди.