“Улар бошлади. Биз жавоб беряпмиз”. Путин Украинага таҳдид қилди

Россия расмийлари Украинанинг Wildberries ва Ozon маркетплейслари омборларига берган зарбаларини кутмаган эди. Бу ҳақда кеча, 15 октябрь куни Россия Президенти Владимир Путин “Деловая Россия” съездида қилган чиқишида гапирди.

“Сиз айтган муаммолар, афсуски душманнинг платформаларимиз, Wildberries ва Ozon’га қарши ҳаракатларига дуч келганимиз ҳақида биламан. Буни қарангки, улар ҳар сафар биз, очиғини айтганда, олдиндан кўра билишимиз керак бўлган, аммо бунга ақллари етмайди деб ўйлаган қадамларни ташлашмоқда. Ақллари етди”, дейди Путин. 

У Wildberries асосчиси Татьяна Кимнинг Украина томонидан компания омборларига берилган зарбалар ҳақидаги чиқишига шундай муносабат билдирган.

Путиннинг сўзларига кўра, Россия бундай зарбаларга “жавоб беришни бошлаганидан” кейин, Украина томони “Россияни тўхтатиш учун ўз ҳомийларига илтимос билан” мурожаат қилмоқда. Путин энергетика объектлари билан ҳам шундай бўлганини қўшимча қилган. Шу билан бирга, у Украинанинг Россия нефтни қайта ишлаш заводларига берган сўнгги зарбаларини “арзимас” деб атаган.

Россия ушбу ҳужумларга жавоб беришни бошлаб бўлганини айтган.

“Улар биринчи қадамни ташлашди. Биз жавоб беришни бошладик. Ҳозир энергетика бўйича ҳам, бошқа объектлар, жумладан, маълумотларни қайта ишлаш марказлари ва бошқалар бўйича ҳам худди шундай чинқиришмоқда. Улар бошлади. Бошлаш керак эмас эди”, дейди Путин.

Шунингдек, Путин маълумотларни қайта ишлаш марказларига берилган зарбаларга илк бор изоҳ берган. Бироқ контекстдан унинг Украина Қуролли кучларининг “Яндекс” ва “Сбербанк” дата-марказларига берган зарбаларини назарда тутаётгани ёки Россиянинг шунга ўхшаш ҳужумлари ҳақида гапираётгани тушунарсиз.

Эслатиб ўтамиз, жорий йилнинг сентябрь ойида Россия Украинанинг бир нечта дата-марказларига ҳужум қилган эди. Россия Мудофаа вазирлиги эса Киевга “рақамли детокс” билан таҳдид қилган эди. 10 октябрь куни, Украина Қуролли кучларининг “Яндекс”га ҳужумлари бошланганидан сўнг, Россия Украинанинг Tenet провайдерининг Одессадаги дата-марказига ва Киевдаги “АТМ Укрсиббанк”га зарба берди.

13 октябрь куни Россия Президентининг матбуот котиби Дмитрий Песков Россия дата-марказларига қилинган ҳужумлар мавзуси ҳукуматда муҳокама қилинаётганини маълум қилди. Эртаси куни Путин киберхавфсизлик масалалари бўйича йиғилиш ўтказди.

Тадбирнинг очиқ қисмида Путин йиғилиш иштирокчиларидан “рақамли хавфсизлик даражасини оширишга имкон берадиган” таклифларни кутаётганини айтди. Унинг сўзларига кўра, “тўғридан тўғри ва гибрид ташқи тажовуз фонида” кибертаҳдидлар янги босқичга чиқмоқда.