Украиналик депутатлар Ўзбекистонга келди

Украинанинг Ўзбекистондаги элчихонасида украин ва қрим-татар диаспораси билан учрашув бўлиб ўтиши муносабати билан украиналик депутатлар Ўзбекистонга келди. Бу ҳақда мамлакатдаги Украина элчихонаси хабар берди.

Қайд этилишича, мазкур учрашув жорий йилнинг 6 апрель куни соат 13:00 да бўлиб ўтади. Учрашув кун тартибидан Ўзбекистон Республикасидаги Украина элчиси Николай Дорошенконинг очилиш сўзи, 30 дақиқалик қисқа метражли ҳужжатли фильм намойиши ва диаспора билан суҳбат ўрин олган. 

Суҳбатда Украина Олий Радасининг халқ ноиби, Олий Рада раисининг биринчи ўринбосари Александр Корниенко ва “Қрим платформаси” парламентлараро бирлашмасининг ҳаммуаллифи, 2022–2024 йилларда Украина Президентининг Қрим Автоном Республикасидаги вакили Тамила Ташева иштирок этади. Суҳбатда маданий мерос ва миллий ўзлик, диаспоранинг Украинага халқаро қўллаб-қувватловдаги ўрни ва ҳозирги ҳамкорлик масалалари муҳокама қилинади.

Шунингдек, “Эркин Қримга мактублар” акцияси ўтказилади ва иштирокчилар украиналик сиёсий маҳбусларни қўллаб-қувватловчи мактублар ёзиш имкониятига эга бўлади.

“Сизни ушбу муҳокамага қўшилишга таклиф қиламиз! Келинг, биргаликда Украинани дунёда бирлик ва қўллаб-қувватлаш билан мустаҳкамлаймиз”, дейилади эълонда.

Депутатлар бугун, 4 апрель куни Ўзбекистон Республикаси Олий Мажлиси Сенати Раисининг биринчи ўринбосари Содиқ Сафоев билан учрашди. Украина-Ўзбекистон ҳамкорлиги, маданиятни асраб-авайлашнинг аҳамияти ва жаҳон хавфсизлиги масаласи муҳокама қилинди.

Шунингдек, украиналик депутатлар умумий демократик қадриятларга эга 47 мамлакат парламентларини ўз ичига олган “12+” геосиёсий гуруҳи йиғилишида ҳам иштирок этди. Ҳамкорлик масалалари, Ассамблея кун тартиби муҳокама қилинди ва биргаликдаги ишларнинг кейинги босқичлари келишиб олинди.

Депутатлар 5-9 апрель кунлари “Tashkent City” ҳудудидаги Конгресс-холл мажмуасида ўтказиладиган Парламентлараро иттифоқнинг 150-Асамблеясида ҳам иштирок этади.