Украина халқи талаб қилмагунча сайловлар керак эмас – Еврокомиссия

Украинада президентлик сайловлари Украина халқи талаб қилмагунча ўтказилиши керак эмас. Бу ҳақда Еврокомиссия матбуот хизмати раҳбари Паула Пиньо бугун, 28 март куни Брюсселдаги брифингда сўз очди. 

Унинг таъкидлашича, Владимир Зеленский демократик йўл билан сайланган ва агар Украина жамияти сайловлар ўтказиш бўйича талабларни илгари сурмаса, бошқа ҳеч ким уларни бошлашни талаб қила олмайди.

Бу изоҳ журналистларнинг Зеленскийнинг президентлик лавозимида бўлишининг қонунийлиги бўйича Россия позициясини баҳолаш ҳақидаги илтимосига жавобан айтилган.

Эслатиб ўтамиз, аввалроқ АҚШ Президенти Дональд Трампнинг махсус вакили Стивен Уиткофф журналист Такер Карлсонга берган интервьюсида Украина раҳбарияти президентлик сайловларини ўтказишга рози бўлганини маълум қилган эди. Бироқ у сайловлар қандай шартларда ва қачон ўтказилиши борасида маълумот бермаган. Кеча, 27 март куни эса Россия Президенти Владимир Путин “Архангельск” атом сувости кемаси денгизчилари билан учрашувда Украинада БМТ ва бир нечта давлатлар ҳомийлигида вақтинчалик бошқарувни жорий этиш масаласини муҳокама қилишни таклиф қилган, шунингдек, ушбу бошқарув остида сайловлар ўтказиш ғоясини илгари сурганди.