Путин Украинада ташқи бошқарув жорий этишни таклиф қилди

Россия Президенти Владимир Путин Украинада БМТ ва бир нечта давлатлар ҳомийлигида вақтинчалик бошқарувни жорий этиш масаласини муҳокама қилишни таклиф қилди, шунингдек, ушбу бошқарув остида сайловлар ўтказиш ғоясини илгари сурди. Бу ҳақда у “Архангельск” атом сувости кемаси денгизчилари билан учрашувда сўз очди.

Путиннинг сўзларига кўра, сайловлар ўтказилгандан кейин тинчлик шартномаси бўйича музокаралар бошланиши мумкин.

“БМТ ҳомийлигида Қўшма Штатлар билан, ҳатто Европа давлатлари билан, албатта, бизнинг ҳамкорларимиз ва дўстларимиз билан Украинага вақтинчалик бошқарув жорий этиш имкониятини муҳокама қилиш мумкин. Демократик сайловлар ўтказиш, халқ ишончига эга бўлган, ишга лаёқатли ҳукуматни ҳокимиятга олиб келиш учун”, деди у.

Путин, шунингдек, илгари ҳам Шарқий Тимор, Янги Гвинея ва собиқ Югославиянинг айрим ҳудудларида БМТ ҳомийлигида ташқи бошқарув жорий этилган ҳолатлар бўлганини эслатиб ўтган.

“Бу фақат битта вариант. Мен бошқа вариантлар йўқ, деб айтмаяпман. Вазият тез ўзгариб бормоқда”, дея қўшимча қилган Владимир Путин.

Маълумот учун, Украинада охирги президентлик сайловлари 2019 йилда ўтказилган. 2024 йилда эса уруш шароити сабабли сайловлар бекор қилинган.

Эслатиб ўтамиз, аввалроқ АҚШ Президенти Дональд Трампнинг махсус вакили Стивен Уиткофф Украина раҳбарияти президентлик сайловларини ўтказишга рози бўлганини маълум қилган эди. Бироқ у сайловлар қандай шартларда ва қачон ўтказилиши борасида маълумот бермаган.