Уиткофф эртага Путиннинг ҳузурига боради

АҚШ Президентининг махсус элчиси Стивен Уиткофф эртага, 2 декабрь куни Россия Президенти Владимир Путин билан учрашади. Бу ҳақда Кремль матбуот котиби Дмитрий Песков маълум қилди.

Журналист Песковдан: “Учрашув куннинг биринчи ярмига режалаштирилганми?”, деб сўраган. “Йўқ, иккинчисига”, деб жавоб қайтарган Кремль матбуот котиби.

“The Telegraph” газетасининг Оқ уйдаги манбаларига таяниб ёзишича, махсус элчига АҚШ Президентининг куёви Жаред Кушнер ҳам ҳамроҳ бўлади.

Эслатиб ўтамиз, кеча, 30 ноябрь куни Уиткофф ва Кушнер Украина делегацияси билан учрашганди. Делегацияга Украина Миллий хавфсизлик ва мудофаа кенгаши котиби Рустам Умаров раҳбарлик қилган. Америкадан эса учрашувда АҚШ Давлат котиби Марко Рубио ҳам иштирок этган. Россия–Украина можаросини тартибга солиш режасининг тафсилотлари Уиткоффнинг Shell Bay гольф-клубида муҳокама қилинган.

“Axios” нашри Уиткофф ва Кушнернинг АҚШнинг 28 банддан иборат биринчи тинчлик режаси лойиҳасини тайёрлашда иштирок этганини ёзди. Ушбу лойиҳа жорий йилнинг 23 ноябрь куни Женевада АҚШ ва Украина делегациялари ўртасида муҳокама қилинган.

27 ноябрь куни Владимир Путин жанговар ҳаракатлар фақат Украина қўшинлари ДНР ва ЛНРдаги эгаллаб турган ҳудудлардан чиқиб кетганидан кейингина тўхташини айтди. У, шунингдек, АҚШнинг дастлабки тинчлик режаси келишув учун асос бўлиши мумкинлигини, бироқ “ҳаммасини дипломатик тилда ифодалаш кераклигини” қайд этди.