Ufadagi neft zavodlari dron hujumiga uchrab, yonib ketdi

Bugun, 25 iyun kuni ertalab Ukraina dronlari Rossiyaning Boshqirdiston hududidagi Ufa shahrida joylashgan “Rosneft” kompaniyasiga tegishli neftni qayta ishlash korxonalariga dron hujumi uyushtirdi. Hujumdan keyin uchta yirik neftni qayta ishlash ob’ektida yong‘in yuz bergan. Bu haqda “The Moscow Times” xabar berdi.

Ukraina xavfsizlik xizmati (UXX) ma’lumotlariga ko‘ra, hujum maxsus operatsiya diorasida amalga oshirilgan.

“UXXning Alfa maxsus operatsiyalar markazi askarlari Ufadagi Bashneft guruhining neftni qayta ishlash zavodlariga muvaffaqiyatli zarba berishdi. Nishonlar Ukraina chegarasidan 1500 kilometr uzoqlikda joylashgan”, deyiladi bayonotda.

Ma’lumotlarga ko‘ra, zarba oqibatida zarar yetgan “Bashneft-Novoyl” zavodi yiliga 7,3 million tonna, “Bashneft-Ufaneftexim” esa 9 million tonna neftni qayta ishlash imkoniyatiga ega. “Asta” nashrining xabar berishicha, “Bashneft-UNPZ” ham hujum nishoniga aylangan bo‘lishi mumkin. Mazkur zavodning yillik neftni qayta ishlash imkoniyati qariyb 7 million tonnaga teng.

UXX ma’lumotlariga ko‘ra, hujum oqibatida neftni dastlabki qayta ishlash jarayonini amalga oshiruvchi AVT bloklarida yong‘in yuzaga kelgan. Guvohlarning tasvirlari kamida ikkita alohida yong‘inni tasdiqlaydi. Internetda tarqalgan videolarda neftni qayta ishlash zavodlari ustida qora tutun ko‘tarilgani ko‘ringan.

Boshqirdiston rahbari Radiy Xabirov ham Ufaga dron hujumi bo‘lganini tasdiqlagan. Uning aytishicha, Rossiya harbiylari hujumni qaytarishga uringan va dron qoldiqlari sanoat hududiga tushgan. Hodisa oqibatida texnologik jarayonlar to‘xtamagan.

Ma’lumot uchun, “Bashneft” kompaniyasi “Rosneft” tarkibiga kirib, bunda Ufaning shimolidagi sanoat hududida bir-biriga yaqin joylashgan uchta yirik neftni qayta ishlash zavodini boshqaradi.

Avvalroq ham ushbu hududdagi korxonalar dron hujumlariga uchragan. Jumladan, 2026 yil mart oyida Ufaning sanoat zonasida dron hujumi ortidan yong‘in chiqqan. Aprel oyida esa “Bashneft-Novoyl” zavodining AVT-5 qurilmasiga zarba berilgan.

Ukraina tomoni Rossiyadagi neft infratuzilmalariga hujumlarni urushni davom ettirish imkoniyatlarini cheklash maqsadida amalga oshirilayotganini bildiradi. Ukraina Prezidenti Vladimir Zelenskiy Ufa neft zavodlari va Kubandagi neft bazasiga qilingan zarbalarni Rossiyaning Ukrainaga qarshi hujumlariga “javob” sifatida baholagan.

Eslatib o‘tamiz, avvalroq anneksiya qilingan Qrimning g‘arbiy va shimoliy qismidagi Yevpatoriya, Jankoy va qator boshqa aholi punktlari hujumga uchragandi va aholi elektrsiz qolgan edi.