Учинчи уринишда ҳам янги папа сайланмади (видео)

Ватикандаги католик черкови кардиналлари йиғилиши учинчи уринишда ҳам янги Рим папасини сайлай олмади. Бу ҳақда ANSA хабар берди.

Маълум қилинишича, католик черковининг янги раҳбарини сайлаш мақсадида чақирилган конклав кеча, 7 май кунидан бери давом этмоқда. У апрель ойи охирида олдинги папа Франциск вафотидан кейин эълон қилинган. Сайловларда амалдаги 252 кардиналдан 133 нафари иштирок этмоқда.

Қора тутун Рим папаси лавозимига номзодларнинг ҳеч бири овозларнинг учдан икки қисмини тўплай олмаганини англатади ва учинчи уринишдан кейин ҳам қора тутун чиқарилган.  Конклав янги папа сайланмагунча давом этади, бу вақтда кардиналларга ташқи дунё билан мулоқот қилиш тақиқланади.

Агентликнинг аниқлик киритишича, овоз беришнинг уч босқичи бўлиб ўтган. Бир кунда улар тўртта бўлиши керак. Кардиналлар тушликка чиқиб кетган, улар куннинг иккинчи ярмида яна овоз бериш учун йиғилишлари керак. Тўртинчи раунд якунида Сикстин капелласининг мўрисидан яна тутун чиқарилади.

Биринчи куни овоз беришнинг бир тури ўтказилади. Агар янги понтифик сайланмаган бўлса, кейинги кунларда кунига тўрт марта овоз берилади. Ҳар бир босқич бюллетенларни печда ёқиш билан якунланади.

Конклавлар турлича давом этади. Масалан, 2013 йилда аввалги Рим папаси Францискнинг сайланиши папалик тарихидаги энг тезкор сайловлардан бири бўлган. Уни иккинчи куни бешинчи раундда сайлашган. Энг узоқ давом этган конклав деярли уч йил давом этган (1268 йил ноябрдан 1271 йил сентябргача), бу жараёнда учта сайловчи вафот этган.

Эслатиб ўтамиз, Рим папаси Франциск жорий йилнинг 21 апрель куни 88 ёшида инсульт сабаб Ватикандаги қароргоҳида вафот этганди. Унинг дафн маросими 26 апрель куни Ватикандаги Авлиё Пётр майдонида 200 мингга яқин инсон билан ўтказилганди.