Dunyo yetakchilari Vatikanda. Rim papasining dafn marosimida O‘zbekistondan kim qatnashdi?

Bugun, 26 aprel kuni dunyoning ko‘plab yetakchilari Vatikandagi Avliyo Pyotr maydonida 200 mingga yaqin inson bilan birga Rim papasi Fransiskning dafn marosimida ishtirok etmoqda. 

Xususan, AQSH Prezidenti Donald Tramp, Ukraina Prezidenti Vladimir Zelenskiy, Germaniya Prezidenti Frank-Valter Shtaynmayer, Fransiya Prezidenti Emmanyuel Makron, Italiya Prezidenti Serjio Mattarella, Britaniya Bosh vaziri Kir Starmer shahzoda Uilyam hamrohligida va Iordaniya qiroli Abdulla II ham dafn marosimida bevosita qatnashmoqda.

Ushbu yig‘inda O‘zbekistondan Oliy Majlis Senati Raisining birinchi o‘rinbosari Sodiq Safoyev ishtirok etmoqda.

Ma’lumot uchun, argentinalik Rim Papasi Fransisk Vatikanga emas, balki Santa-Mariya-Major Rim bazilikasiga dafn etilishi kutilmoqda.

Eslatib o‘tamiz, Rim papasi Fransisk 21 aprel kuni 88 yoshida insult sabab Vatikandagi qarorgohida vafot etgandi. Avvalroq O‘zbekiston Respublikasi Prezidenti Shavkat Mirziyoyev papaning vafoti munosabati bilan Rim-katolik cherkovi kamerlengosi kardinal Kevin Farrellga hamdardlik yo‘llagan edi.