Туркияда яна 33 киши қалбаки алкоголдан ҳалок бўлди

north_east

Туркияда ўлаётган ўзбеклар

Туркиянинг пойтахти Анқара шаҳрида қалбаки спиртли ичимликлар туфайли 33 киши ҳаётдан кўз юмди. Бу ҳақда Анқара губернатори Васип Шахин маълум қилди.

Губернатор маълумотларига кўра, қалбаки спиртли ичимликлар таъсирида 33 нафар одам вафот этган ва 20 киши реанимацияда даволанмоқда.

“Афсуски, қалбаки спиртли ичимликлар истеъмол қилиш оқибатида 33 нафар фуқаромиз ҳаётдан кўз юмди. Касалхоналаримизда 20 киши реанимацияда даволанмоқда”, деган Анқара губернатори.

Унинг сўзларига кўра, ушбу ҳолатлар юзасидан текширув ишлари аллақачон бошлаб юборилган.

“Сўнгги пайтларда вилоятимизда қалбаки спиртли ичимликлар туфайли жиддий ўлим ҳолатлари кузатилмоқда. Буларга қарши курашда ҳуқуқ-тартибот идораларимиз томонидан қалбаки спиртли ичимликлар ишлаб чиқариш орқали фуқароларимиз ҳаётига таҳдид солувчи шахсларга нисбатан текширувлар давом этмоқда”, деган у.

Қайд этилишича, ушбу ҳаракатлар натижасида 102 тоннага яқин этил ва метил спирти мусодара қилинган.

“Уларнинг 62 тоннаси бу ерда олиб борилаётган операцияларимиз доирасида Дюздже ва Коньядан олинган”, деган губернатор.

Шунингдек, губернатор Шахин ноқонуний спиртли ичимликлар ишлаб чиқариш ва сотиш билан шуғулланган 32 кишига нисбатан чора кўрилганини, улардан 13 нафари қўлга олиниб, 17 нафари эса суд назорати шарти билан қўйиб юборилганини маълум қилган ва фуқароларни спиртли ичимликлар истеъмол қилмасликка чақирган.

“Илтимос, спиртли ичимликлардан йироқ бўлайлик. Спиртли ичимликлар соғлиғимиз ва келажагимиз учун зарарли бўлган моддадир. Айниқса, қалбаки спиртли ичимликлар ҳаётга таҳдид солади. Шунинг учун спиртли ичимликлар истеъмол қилинмаслиги керак, агар истеъмол қилинса, ваколатли дилерлардан ва маълум жойлардан сотиб олиниши керак”, дея қўшимча қилган у.

Эслатиб ўтамиз, 30 январь куни Туркия ҳудудида қалбаки спиртли ичимлик истеъмол қилиш оқибатида заҳарланган Ўзбекистон фуқаролари сони 23 нафарга етганди. Уларнинг икки нафари аёл киши. Қолаверса, Истанбулда қалбаки спиртли ичимликларни тайёрлаш ҳамда тарқатиш билан шуғулланиб келган икки нафар Туркманистон фуқароси қўлга олинганди.