Туркияда президентлик сайловларининг иккинчи босқичи натижалари биринчи турга нисбатан эртароқ чиқади — ОСК раҳбари

Туркия Олий сайлов комиссияси раҳбари Аҳмет Енер президентлик сайловларининг иккинчи босқичи натижалар 14 майдагидан ҳам тезроқ чиқишини кутмоқда. Бу ҳақда у бугун, 28 май куни Анқарадаги сайлов участкасида журналистларга берган интервьюсида айтиб ўтди.

“Туркияда президентлик сайловларининг иккинчи босқичида овоз бериш нохуш ҳодисалар ва муаммоларсиз ўтмоқда. Фуқаролар биринчи турда бўлгани каби сайловга юқори қизиқиш билдирмоқда. Хабарингиз бор, 14 май куни бўлиб ўтган сайловда президентликка номзодлар ва бошқа 24 партия иштирок этди. Ҳозир эса бизда президентликка фақат иккита номзод бор. Шунинг учун биз натижаларни қисқа вақт ичида ҳисоблашни кутмоқдамиз. Натижаларнинг турк миллати ва демократияси учун қулай бўлишини тилайман”, деган Аҳмет Енер.  

Маълумот учун, Туркиядаги сайлов участкалари бугун, 28 май куни маҳаллий вақт билан соат 08:00 да очилди ва улар соат 17:00 да ёпилади. Мамлакат бўйлаб 191 мингдан ортиқ сайлов қутилари ўрнатилган. Сайловчилар сони 60 миллион кишидан ошади.

Эслатиб ўтамиз, шу йилнинг 14 май куни Туркияда президентлик сайловининг биринчи босқичи ўтказилганди. Унда Эрдўған 49,51%, Қиличдорўғли 44,88% овоз тўплади. Биринчи турда ғалаба қозониш учун номзодга 50 фоиздан ортиқ овоз керак эди, шунинг учун бугун, 28 май куни Туркияда сайловнинг иккинчи босқичи бўлиб ўтмоқда.