Туркия ва Покистон ИШИД аъзосини қўлга олди

Туркия Миллий разведка ташкилоти ҳамда Покистон- разведка хизмати томонидан Покистон-Афғонистон чегарасида олиб борилган қўшма махсус операция натижасида халқаро террор ташкилоти – ИШИДнинг юқори лавозимли турк вакили Абу Ясир ал-Туркий номи билан танилган Ўзгур Альтун қўлга олинди. Бу ҳақда “Aydinlik” хабар берди.

Маълум қилинишича, Миллий разведка ташкилоти ўтказган текширув тадқиқотлари натижасида Европа ва Марказий Осиёдан Афғонистон–Покистон ҳудудига ўтишни режалаштирилаётган шахс қўлга олинган. У ИШИДнинг оммавий ахборот воситалари ва логистика йўналишида фаолият юритган ва “энг юқори даражадаги ИШИД раҳбари” сифатида танилган Туркия фуқароси бўлиб чиққан. Шунингдек, ушбу шахс Туркия ва Европадаги тинч аҳоли қатнашадиган концерт ва оммавий тадбирларга қарши ҳужумлар бўйича буйруқлар берган.

Туркия томонидан тўпланган разведка маълумотларига кўра, Ўзгур Альтун Афғонистонда фаолият юритиб, Покистонга ўтишни режалаштирган. Бу маълумотлар Покистон разведка хизматига етказилган ва улар Туркияга тўлиқ ёрдам кўрсатишга тайёр эканини билдирган.

Шундан сўнг, Покистон кучлари билан мувофиқлаштирилган ҳолда олиб борилган аниқ ҳаракатлар натижасида развекачилар Альтунни Покистон-Афғонистон чегарасида қўлга олиб, уни Туркияга депортация қилган.

Сўроқ жараёнида Альтун Туркиядан Афғонистон–Покистон ҳудудига ИШИД аъзоларини йўналтиргани, ИШИДнинг ахборот нашрларини (жумладан инглиз ва турк тилларида) бошқаргани ва бутун дунёдаги шахсларни ҳужумларга ундагани ҳақида гапирган.