Туркия гўзали новвойхонада иш бошлади (видео)

Туркияда гўзаллик танловининг ғолибаси, модель ҳамда таржимон Ирмоқ Ўзтош бошқа иш топа олмагани сабаб новвойхонага ишга кирди. Бу ҳақда “Odatv” хабар берди.  

Маълумотларга кўра, Ўзтош 2022 йилда “Best Model” миллий танловида “Жануби-Шарқий Анадолунинг энг яхши модели” унвонини қўлга киритган ва Жанубий Кореяда ўтказилган “World Miss University” танловида иштирок этган. Шундан сўнг у Туркияга қайтиб, актёрлик ва моделлик фаолиятини бошлаш учун Истанбулга жойлашган. Бироқ унга иш таклифлари чиқмаган.

Кейинчалик у ўзининг туғилган шаҳри Измирга қайтган. Измир иқтисодиёт университетини таржимонлик йўналиши бўйича тамомлаганига қарамай, у 7 ой давомида ўзига мос иш топа олмаган.

Ўзтошнинг танишларидан бири ҳам Истанбулда актёр бўлишга ҳаракат қилган, аммо узоқ вақтдан бери новвойхонада ишлаётганини айтган. Шундан сўнг қиз ҳам барқарор даромад топиш ва янги касбни синаб кўриш мақсадида айни новвойхонада ишлашга қарор қилган.

Ирмоқ Ўзтошнинг ҳикояси маҳаллий ОАВ эътиборини тортди. У сўнгги йилларда сунъий интеллект кенг тарқалгани сабаб ўз мутахассислиги бўйича иш топиш қийинлашганини ҳам таъкидлади. Шунга қарамай, унинг тажрибаси бор — у инглиз тилидан турк тилига икки китоб ва бир ҳужжатли фильмни таржима қилган.

“Мен актёрликни ўрганмоқчи эдим, лекин отам “Тилни яхши биласан, актёрликни хобби сифатида давом этасан, университетни битир”, деганди. Мен отамга қулоқ тутдим ва ҳаммаси шундай бўлди. Нима ҳам дейиш мумкин, умид қиламанки, ишсизлик муаммоси ҳал бўлади. Ўзим ҳақимда айтсам, ҳозир ўз нонимни топдим”, дея хулоса қилган Ўзтош.

Эслатиб ўтамиз, аввалроқ “Дунё гўзали” (Miss World) халқаро гўзаллик танловининг 2025 йилги ғолибаси таиландлик Сучата Чуангсри бўлди.