Туркия BRICS билан ҳамкорлик қилиш учун суверен ҳуқуққа эга – НАТО

Туркия ўзининг BRICS бўйича ҳамкорлари билан ишлашда суверен ҳуқуққа эга. Бу ҳақда НАТО Бош котиби Марк Рютте Таллинда Эстония Бош вазири Кристен Михал билан қўшма матбуот анжуманида айтиб ўтди.

Рютте Туркиянинг BRICS’га кириши “ташвиш манбаи” бўлганми деган саволга жавобан НАТО “Туркия ҳам BRICS бўйича баъзи шериклари билан ишламоқда ва бу унинг суверен ҳуқуқи” эканини билишини айтди. Альянс Бош котиби Туркия НАТОдаги “жуда муҳим иттифоқчи” эканини таъкидлади.

“Туркия НАТОнинг энг яхши жиҳозланган армияларидан бирига эга. У НАТО географиясининг ўз қисмида (жанубий-шарқий қанот) муҳим роль ўйнайди. Бу бутун НАТО учун кўплаб имкониятлар беради”, деб таъкидлади у.

Рютте Туркиянинг узоқ йиллардан бери НАТОнинг бир қисми эканлигини эслатди.

“Туркия узоқ йиллар давомида Иттифоқнинг ажралмас қисми бўлиб келганидан жуда хурсандмиз ва мамнунмиз. Албатта, альянсдаги 32 демократик давлат ўртасида у ёки бу масала бўйича мунозаралар доимо бўлади", деди НАТО Бош котиби.

Шимолий Кореянинг Украина билан бўлган можарода Россияни қўллаб-қувватлаш учун қўшин юбориш эҳтимолини изоҳлар экан, Рютте бу масала бўйича Жанубий Корея Президенти Юн Сок Ёль билан телефон орқали мулоқот қилганини айтди. Унинг таъкидлашича, у Жанубий Кореядан келаси ҳафта НАТОга ушбу масала бўйича маълумот бериш учун мутахассислар юборишни сўраган.

“Вазиятнинг бундай ривожланиши минтақадаги кескинликнинг кучайишига олиб келади. Биз ҳозир кун тартибига қўйилган айбловларни тасдиқлай олмаймиз", деб қўшимча қилди у.

Эслатиб ўтамиз, олдинроқ Туркия Ташқи ишлар вазири Хоқон Фидан  Хитойга сафари чоғида Туркия BRICS’га аъзо бўлмоқчилиги, бу масала иттифоқ вазирларининг Нижний Новгороддаги йиғилишида муҳокама қилинишини айтганди. “Bloomberg” нашри эса манбаларига таяниб, Туркия ҳукумати бир неча ой олдин BRICS'га аъзо бўлиш учун ариза топширганини ёзди.