Туннелда аёлга шилқимлик қилган эркак қамалди 

Аввалроқ, Учтепа тумани Лутфий кўчасида 29 ёшли аёлга нисбатан уятсиз ҳаракат қилиб, сўнг воқеа жойидан қочиб кетган эркак ушлангани ҳақида хабар берилган эди. Кеча, 7 январь куни судда ушбу фуқаронинг иши кўриб чиқилди ва унга нисбатан 15 сутка маъмурий қамоқ жазоси тайинланди. QALAMPIR.UZ суд ҳужжати билан танишиб чиқди.  

Унга кўра, мазкур иш 2026 йилнинг 7 январь куни жиноят ишлари бўйича Учтепа туман судида кўриб чиқилган. Унда судланувчи айбига қисман иқрор бўлган. Маълум қилинишича, фуқаро А.Н. 2026 йил 6 январь куни маст ҳолатда Учтепа тумани, 23-мавзе, Лутфий кўчасидаги автобус бекати олдида шимини ечиб жинсий аъзосини шу ерда бўлган Л.Қ.га кўрсатиб, шаҳвоний шилқимлик  қилган. У шунингдек, бекат олдидаги ер ости йўлида ҳам ушбу ҳаракатларни такрорлаб, шу ердан ўтиб кетаётган Л.Қ.га яна бир бор шилқимлик қилган.

Фуқаро А.Н.  7 январь куни содир қилинган ҳуқуқбузарлик юзасидан суриштирув ҳаракатлари олиб борилиши учун ИИО ходимлари томонидан расмий равишда ИИБга чақиртирилган бўлишига қарамай, идорага келмаган. 

Суд мажлисида ҳуқуқбузар ўз айбига қисман иқрорлиги, ўша куни спиртли ичимлик ичганлиги ва маст ҳолатда бўлганлигини айтиб, суддан ўзига нисбатан енгиллик сўраган.

Жабрланувчи аёл эса эркакнинг бузуқ ҳаракатларидан қаттиқ қўрқиб, ўша ердаги кийим дўконига кириб тахминан 30 дақиқа дўкон ичида бўлгани, шундан кейин ер ости йўлида кетаётганида эркак унга яна шилқимлик қилгани ва кетишига йўл қўймаганини айтиб, А.Н.га қонунда белгиланган энг оғир жазодан ҳам оғирроқ жазо тайинлашни сўраб кўрсатма берган.

Судда ҳуқуқбузар сўраган енгиллик ички ишлар органи ходимлари билдирги, жабрланувчи аризаси, тушунтириш хати, гувоҳларнинг тушунтириш хати ҳамда далиллар сабабли тўлиқ рад этилган. 

Қарорга кўра, ҳуқуқбузар фуқаро Ўзбекистон Республикаси Ўзбекистон Республикасининг Маъмурий жавобгарлик тўғрисидаги кодексининг 183-моддаси (майда безорилик) , 41-1 -моддаси 1-қисми (шаҳвоний шилқимлик) қилиш ва 194-моддаси 1-қисмида (ички ишлар органлари ходимининг қонуний талабларини бажармаслик) назарда тутилган ҳуқуқбузарликларни содир қилган деб топилган ва унга МЖтКнинг 34-моддасига (бир неча ҳуқуқбузарликни содир этганлик учун маъмурий жазо қўллаш) узил-кесил 15 сутка маъмурий қамоқ жазоси тайинланган. Жазони ўташ муддати 7 январь кунидан бошлаб ҳисобланган. Шунингдек, А.Н. ҳисобидан Тошкент шаҳар ИИББ Махсус қабулхона фойдасига 927.000 сўм ундирилган.

Эслатиб ўтамиз, аввалроқ Тошкент шаҳрининг Сергели туманида 2007 йилда туғилган йигит ўзига нотаниш бўлган қизга шаҳвоний ҳаракатларни содир этгани учун 5 суткага қамалган эди.