Tunnel qulashi oqibatida 12 ishchi halok bo‘ldi

Hindistonning shimoli-sharqidagi Sikkim shtatida qurilayotgan tunnelda gaz portlab, uning bir qismi quladi. Hodisa oqibatida kamida 12 ishchi halok bo‘ldi. Bu haqda BBC xabar berdi.

Qayd etilishicha, voqea joriy yilning 20 iyul kuni sodir bo‘lgan. Ayni paytda tunnel ichida qolib ketgan yana 13 nafar ishchini qidirish-qutqarish ishlari davom ettirilmoqda.

Ma’lumotlarga ko‘ra, portlash tunnelning taxminan 1,5 kilometr ichkarisida sodir bo‘lgan. Qurilayotgan ushbu tunnel Testa daryosidan gidroelektrostansiya turbinalariga suv yetkazib berish uchun mo‘ljallangan bo‘lib, u davlatga qarashli Milliy gidroelektrostansiyalar korporatsiyasi tomonidan amalga oshirilayotgan yirik loyiha tarkibiga kiradi.

Hodisa tog‘ jinslari orasida to‘planib qolgan metan gazining to‘satdan portlashi oqibatida yuz bergan. Portlash natijasida zich tutun va zaharli gazlar tarqalgan.

Sikkim hukumati ham avariya metan gazining yonishi sababli sodir bo‘lganini ma’lum qilgan.

Qayd etilishicha, hodisa vaqtida tunnelning turli qismlarida jami 27 nafar ishchi bo‘lgan. Ulardan ikki nafari tashqariga chiqishga ulgurgan, qolgan 25 kishi esa ichkarida qolib ketgan.

Politsiya boshlig‘i Sonam D. Bxutianing aytishicha, hozirgacha 12 nafar ishchining jasadi topilgan. Qutqaruvchilar yana 13 kishini izlash ishlarini davom ettirmoqda.

Huquq-tartibot idoralari yetti nafar marhumning shaxsini aniqlagan. Ularning biri Sikkim shtatidan, qolganlari esa G‘arbiy Bengaliya, Uttarakxand va Assam shtatlaridan bo‘lgan migrant ishchilar ekani aytilmoqda.

Rasmiylarning ta’kidlashicha, halok bo‘lganlarning o‘lim sababi sud-tibbiy ekspertizadan so‘ng aniqlanadi.

Hindiston Milliy tabiiy ofatlarga javob berish kuchlari vakillari qutqaruv ishlari ishchilar bo‘lishi mumkin bo‘lgan 200 metrlik hududda olib borilayotganini bildirgan.

Sikkim shtati bosh vaziri Prem Singx Tamang hodisa sabablarini o‘rganish uchun maxsus tergov guruhi tuzilganini ma’lum qildi.

“Voqea qanday sodir bo‘lganini aniqlash uchun mutaxassislar guruhi jalb qilindi. Tekshiruv natijalariga ko‘ra tegishli choralar ko‘riladi”, dedi Tamang.

Eslatib o‘tamiz, avvalroq Hindistonning shimoliy va shimoli-sharqiy hududlarida kuchli yog‘ingarchilik oqibatida yuzaga kelgan suv toshqinlari va ko‘chkilar sabab kamida 25 kishi halok bo‘lgan edi.