Трампнинг одами Иброҳим келишувлари тез орада кенгайишини айтди

north_east

Трамп аш-Шарани Исроилни тан олишга чақирди

АҚШ Президенти Дональд Трампнинг махсус вакили Стив Уиткофф Иброҳим келишувларига қўшилиши мумкин бўлган давлатлар билан боғлиқ асосий эълон тез орада эълон қилинишини айтди. Бу ҳақда у бугун, 26 июнь куни CNBC телеканалига берган интервьюсида маълум қилди.

Унинг сўзларига кўра, яқинда имзоланган ўт очишни тўхтатиш Исроилнинг Эронга берган зарбалари туфайли юзага келган кескинлашувга чек қўйган ва можаронинг узоқ давом этадиган урушга айланишининг олдини олган. Уиткофф томонлар ўртасида кенг қамровли тинчлик битимига умид билдирди.

У бундай келишувга эришиш имкониятини кўрсатувчи “кучли сигналлар” олаётганини таъкидлаб, Эроннинг бу жараёнга тайёр экани ҳақида шахсий таассуротга эга эканлигини таъкидлади.

Махсус вакил, шунингдек, Иброҳим келишувларига қўшилиши мумкин бўлган давлатларга нисбатан “катта эълон” яқин орада кутилаётганини айтди.

“Биз бир қатор мамлакатларда муносабатларни нормаллаштириш жараёни бошланиши мумкинлигига ишонамиз”, деди у.

Уиткофф Теҳроннинг ядровий дастурини шарҳлар экан, уранни бойитиш ва қурол-яроғ ишлаб чиқаришни қайта бошлаш АҚШ учун “қизил чизиқ” эканини таъкидлади.

“Уранни бойитишдан ташқари, қуролларнинг ўзи ҳам бизнинг қизил чизиқдир. Биз қуролланиш пойгасига йўл қўя олмаймиз. Бу бутун минтақани беқарорлаштиради”, деди вакил.

Маълумот учун, 2020 йил сентябрь ойида Вашингтонда Исроил томони АҚШ воситачилигида Баҳрайн ва БАА билан муносабатларни нормаллаштириш бўйича ҳужжатларни имзолаган. Уч томонлама битим Иброҳим келишуви деб номланди. Кейинчалик Марокаш ва Судан яҳудий давлати билан муносабатлар нормаллашганини эълон қилди. Баҳрайн ва БАА билан тинчлик ўрнатилгунга қадар Исроил араб давлатлари орасида фақат Миср ва Иордания билан дипломатик муносабатларга эга эди.