Трампнинг божлари қачондан кучга кириши айтилди

АҚШ Президенти Дональд Трамп жорий этган қўшимча 10 фоизлик бож 24 февралдан кучга киради ва 150 кун амал қилади. Бу ҳақда Оқ уй хабар берди.

Ҳужжатга кўра, вақтинчалик импорт божи 24 февраль соат 00:01 дан (Шарқий Америка вақти бўйича) бошланади. Бу бож АҚШга олиб кириладиган товарларга қўлланади.

Аввалроқ, Трамп “барча давлатлар”га нисбатан 10 фоизлик глобал бож жорий қилиш ҳақида фармон имзолаганини айтган эди.

Бундан бир кун олдин эса Олий суд АҚШ Президенти фавқулодда ҳолатлар ҳақидаги қонунга таяниб киритган айрим тарифларни ноқонуний деб топган. Суд фикрича, Президент ўз ваколатидан ошиб кетган.

Суд қарори кўплаб тарифларга таъсир қилди. Жумладан, дунёнинг кўп давлатларига нисбатан қўлланилган “ўзаро” божлар, Хитой, Канада ва Мексикадан келадиган товарларга қўйилган тарифлар қайта кўриб чиқилди. Шунингдек, Россия нефтини сотиб олгани учун Ҳиндистонга нисбатан жорий этилган “иккиламчи” божлар ҳам ўзгаришга учради.