Олий суд Трампнинг фавқулодда божларини ноқонуний деб топди

АҚШ Олий суди Президент Дональд Трамп томонидан бир томонлама жорий этилган кенг қамровли фавқулодда божлар федерал қонунга зид, деган қарорга келди. Бу Оқ уй учун ташқи савдо ва иқтисодий сиёсатнинг марказий масаласида муҳим сиёсий мағлубиятдир. Бу ҳақда CNN хабар берди.

Қайд этилишича, суд 6 га 3 овоз билан божлар амалдаги қонун доирасидан чиқиб кетганини билдирган. Кўпчилик фикрини қўллаб-қувватлаган бош судья Жон Робертс Трамп “миқдори, муддати ва қамрови чекланмаган божларни бир томонлама жорий этиш” ваколатига даъво қилаётганини таъкидлаган.

Робертсга кўра, бундай кенг ваколатни амалга ошириш учун Президент Конгресснинг аниқ рухсатини кўрсатиши шарт. Суд Трамп таянишга уринган фавқулодда ваколатлар бунга етарли эмаслигини қайд этган.

Мазкур қарор Трампнинг иккинчи маъмурияти учун консерватив таркибдаги Олий суддан олинган энг жиддий зарбалардан бири сифатида баҳоланмоқда. Аввалроқ суд иммиграция, мустақил агентликлар раҳбарларини ишдан олиш ва бюджет қисқартишлари каби масалаларда Президент тарафини олган эди.