Трамп Япониядаги америкалик ҳарбийлар олдида рақсга тушди (видео)

Бугун, 28 октябрь куни АҚШ Президенти Дональд Трамп Японияга ташрифи чоғида Йокосука ҳарбий-денгиз базасида жойлашган USS George Washington атом авианосецида хизмат қилаётган ҳарбийлар олдида рақсга тушди. Оқ уй Трампнинг авианосецдаги нутқини жонли эфирда намойиш этди.

АҚШ Президенти ҳарбийлар олдида нутқ сўзлаган ва якунда ўзига хос услубдаги рақсни ижро этган. Классик костюм ва USA ёзуви туширилган оқ кепкада бўлган Трамп мусиқа оҳангига мос равишда ҳавода муштларини силкиб, белини қимирлатиб, аудиторияга миннатдорлик билдирган.

Рақс бошланиши билан ҳарбийлар қувонч билан қичқириб юборган, кўпчилик уни телефонларига видеога олган, баъзилари эса Трамп билан бирга ритмга мос равишда қўлларини ҳаракатлантириб, унга қўшилган.

Трамп Village People гуруҳининг машҳур Y.M.C.A. қўшиғи остида рақсга тушган. У бу қўшиқни 2024 йилги сайловолди кампанияси даврида ҳам тез-тез қўллаган ва ўтган йил ноябрь ойида сайловдаги ғалабасидан кейинги чиқишини ҳам айнан шу қўшиқ билан якунлаган эди.

Эслатиб ўтамиз, Трамп Малайзияга рақс билан кириб боргани ҳақида хабар берилган эди. У Куала-Лумпурда қизил гилам билан кутиб олинган. Air Force One самолёти қўнгач, Америка ва Малайзия байроқларини кўтарган махсус мезбонлар Президентни қўл силкиб қарши олганди.

Қайд этиш жоиз, айни дамда Трамп Осиё сафарини амалга оширмоқда. У жорий йилнинг 26 октябрь куни Малайзияга етиб борган. Трамп мамлакат Бош вазири Анвар Иброҳим билан учрашиб, ASEAN етакчиларининг ишчи кечки овқатида иштирок этган. 

Кеча, 27 октябрь куни Трамп Токиога борган. Эртага, 29 октябрь куни АҚШ етакчиси Пусанга учиб кетади ва у ерда Жанубий Корея Президенти Ли Чжэ Мён билан музокаралар ўтказади. Шунингдек, Оқ уй раҳбари Осиё-Тинч океани иқтисодий ҳамкорлиги (APEC) саммитида нутқ сўзлайди. Маҳаллий вақт билан 30 октябрь куни Президент Вашингтонга қайтишдан олдин Хитой Раиси Си Цзиньпин билан икки томонлама учрашувда иштирок этади.