Трамп яқин орада “уруш” бошланишини эълон қилди

АҚШ Президенти Дональд Трамп Венесуэладаги наркокартелларга қарши тез орада қуруқликдан зарбалар берилишини маълум қилди. Бу ҳақда Оқ уй раҳбари кеча, 12 декабрь куни 1980 йилги эркаклар хоккей терма жамоаси аъзоларини тақдирлаш маросимида айтиб ўтди.

“Биз сув йўллари орқали кириб келаётган наркотикларнинг 96 фоизидан қутулдик. Энди қуруқликдан иш бошлаяпмиз, қуруқликда бу анча осон. Бу жараён тез орада бошланади. Бу нафақат Венесуэлага қаратилган қуруқлик зарбалари бўлади, балки наркотик олиб келиб, одамларимизни ўлдираётган ёмон одамларга қарши қуруқликдаги зарбалар бўлади”, деган Трамп. 

Сўнгги ойларда АҚШ Кариб денгизи минтақасига қўшин ва кучларни жамлаган, сентябрдан бошлаб эса Вашингтоннинг иддаосига кўра, наркотрафикка алоқадор бўлган кемаларга зарбалар бера бошлаган. Ноябрь охирида Трамп Венесуэла устидаги ҳаво ҳудуди ёпилганини эълон қилган, бироқ кейинроқ бу мамлакатга зарба берилиши муқаррар дегани эмаслигини айтган.

Венесуэла ТИВ буни куч ишлатиш билан таҳдид ва БМТ низомини бузиш сифатида баҳолаган ҳамда АҚШни Венесуэла билан можарога боришдан тийилишга чақирган. 

Шу ҳафта Трамп Венесуэла қирғоқлари яқинида нефть ташувчи танкер қўлга олингани ҳақида ҳам хабар берди. “The New York Times” маълумотига кўра, гап Skipper номли танкер ҳақида бормоқда, у жорий йилнинг февралидан июлигача Эрондан Хитойга қарийб 2 миллион баррель хом нефть ташиган.

Трамп Мадуро ҳокимияти якунига яқинлашаётганини айтган. Венесуэлада Қуролли кучларга сафарбарлик эълон қилинган, Мадуро эса АҚШни тинчликка чақирмоқда. ОАВ маълумотига кўра, октябрь охирида Трамп венесуэлалик етакчи билан суҳбатда агар Мадуро ихтиёрий равишда лавозимини тарк этмаса, куч ишлатишга тайёр эканини билдирган.

Москва Каракасни қўллаб-қувватламоқда ва Трамп маъмуриятини Венесуэла билан тўлиқ миқёсли можарога янада яқинлашмасликка чақирмоқда. Россия Президенти Владимир Путин 11 декабрь куни Мадуро билан телефон орқали гаплашган. Кремль хабарига кўра, томонлар икки давлат ўртасидаги муносабатларни янада ривожлантириш масалаларини муҳокама қилган.

Мадуронинг айтишича, Путин Венесуэла суверенитетини ҳимоя қилиш борасидаги саъй-ҳаракатларини “қўллаб-қувватлаган”. Венесуэла раҳбари Россия Президентини “катта ака ва дўст” деб атаган.