Tramp va Putinning Ukrainasiz muzokaralari xavfli bo‘ladi – Zelenskiy

north_east

Kiyev Oq uyning Ukraina bo‘yicha rejasini “muvaffaqiyatsiz” deb hisoblamoqda

Kiyev ishtirokisiz urushni tugatish bo‘yicha AQSH-Rossiya muzokaralari hamma uchun xavf tug‘diradi. Bu haqda Ukraina Prezidenti Vladimir Zelenskiy “Associated Press” (AP) axborot agentligiga bergan intervyusida so‘z ochdi.

“Ularning o‘z munosabatlari bo‘lishi mumkin, lekin bizsiz Ukraina haqida gapirish hamma uchun xavfli”, deb ta’kidladi u.

Qayd etish joiz, AQSH Prezidenti Donald Tramp uning ma’muriyati allaqachon Moskva bilan muzokaralar olib borayotganini aytgan, biroq unda kimlar ishtirok etishiga aniqlik kiritmagan.

Zelenskiyning aytishicha, uning jamoasi Trampning yaqin doiralari bilan umumiy darajada aloqada va yaqin kelajakda tafsilotlarni muhokama qilish uchun yuzma-yuz uchrashuvlar o‘tkazilishi kutilmoqda.

Shu bilan birga, Trampning Ukraina bo‘yicha maxsus vakili Keyt Kellogning Kiyevga yanvarga mo‘ljallangan tashrifi qonuniy sabablarga ko‘ra qoldirildi.

Zelenskiy Tramp avvaliga faqat u bilan uchrashsa to‘g‘ri bo‘lardi, degan fikrni bildirdi.

“Men birinchi navbatda u (Tramp) bilan uchrashuv o‘tkazishimiz kerak deb hisoblayman va bu muhim. Aytgancha, buni butun Yevropa istaydi. Amerika rahbari bilan muloqotdan so‘ng “ruslar bilan qandaydir muzokaralar formatiga o‘tishimiz kerak”,  dedi Ukraina Prezidenti.

Zelenskiyning so‘zlariga ko‘ra, u Ukraina, Rossiya, AQSH va Yevropa Ittifoqini muzokaralar stolida ko‘rishni istaydi.

“Menimcha, bu adolatli va samarali bo‘lardi. Lekin hammasi qanday bo‘ladi? Bilmayman”, deydi u.

Zelenskiyning so‘zlariga ko‘ra, Rossiya bilan tuzilgan har qanday kelishuvlar Ukraina ittifoqchilarining xavfsizlik kafolatlari bilan ta’minlanishi kerak. Prezident yana bir bor Ukrainaning NATOga qo‘shilishi uning ustuvorligi bo‘lib qolayotganini ta’kidlab, uni AQSH uchun ham foydali xavfsizlikning “eng arzon varianti”, deb atadi.

“Menimcha, bu Ukraina olishi mumkin bo‘lgan eng arzon xavfsizlik kafolatlari, hamma uchun eng arzon”, dedi u.

Ukraina Prezidenti, shuningdek, Kiyevning alyansga qo‘shilishi “Tramp uchun katta g‘alaba” bo‘lishini, chunki bu NATOda kim bo‘lishi kerakligini Rossiya emas, Qo‘shma Shtatlar hal qilishini ko‘rsatishini ta’kidladi.

“Bundan tashqari, blok ixtiyorida 800 ming ukrainalik askarlar bo‘ladi, bu ayniqsa Tramp xorijda joylashgan amerikalik qo‘shinlarni vataniga olib kelishga harakat qilsa, ayniqsa muhim bo‘ladi. Agar Ukrainaga boshqa xavfsizlik kafolatlari taklif qilinsa, u AQSH va Yevropadan yetarli miqdorda qurol-aslaha olishi kerak, shuningdek, o‘zining mudofaa sanoatini ham qo‘llab-quvvatlash talab etiladi”, deya qo‘shimcha qildi Zelenskiy.

Urush tugaganidan keyin Ukrainada mumkin bo‘lgan tinchlikparvarlik missiyasiga kelsak, Zelenskiy qo‘mondonlik tuzilmasi, shuningdek, Ukrainaga jo‘natilishi taklif etilayotgan tinchlikparvar kontingentning hajmi bilan bog‘liq ko‘plab savollar ochiq qolayotganini ta’kidladi.

“Tasavvur qiling, tinchlikparvar kontingent bor. Savol tug‘iladi: unga kim rahbarlik qiladi? Agar Rossiya zarbalari boshlansa, ular nima qiladi? Ular qanday vakolatlarga ega bo‘ladilar?” deya tushuntirdi u.

Jurnalistning Zelenskiy buni ushbu g‘oya tashabbuskorlaridan biri bo‘lgan Fransiya Prezidenti Emmanuel Makrondan to‘g‘ridan to‘g‘ri so‘raganmi, degan savoliga Ukraina rahbari Kiyev va Parij bu borada “hali ham muloqotda” deb javob berdi.

Zelenskiy, shuningdek, AQSH Davlat kotibi Marko Rubioning urush Ukrainani “100 yil orqaga” uloqtirgani haqidagi so‘zlariga ham izoh berdi. Zelenskiy nafaqat vayronagarchilik, balki ukrainaliklarning o‘z hududlari va butun dunyo xavfsizligini himoya qilish borasidagi sa’y-harakatlarini ko‘rish uchun Rubioni mamlakatga shaxsan tashrif buyurishga taklif qildi.

Saylov kampaniyasi davomida Donald Tramp Rossiyaning Ukrainaga qarshi urushini imkon qadar tezroq hal qilishga va’da bergan edi. 31 yanvar kuni Tramp Moskva bilan “jiddiy muhokamalar” haqida gapirdi, biroq tafsilotlarni keltirmadi.

Kreml Tramp jamoasidan hozircha hech qanday taklif kelib tushmaganini qayd etdi.

Moskva avvalroq tinchlik muzokaralari shartlarini aytib o‘tgan edi: Ukraina qo‘shinlarining Donetsk, Lugansk, Zaporoje va Xerson viloyatlaridan olib chiqib ketilishi, ularni Rossiyaning bir qismi sifatida tan olinishi va sanksiyalarni bekor qilish.

Ukraina Prezidenti Vladimir Zelenskiy buni ultimatum deb atadi va NATO xavfsizlik kafolatlari va qurol-yarog‘ yetkazib berishda davom etishini ta’kidladi.