Трамп Украинадаги урушда Путин, Зеленский ва Байденни айблади

Россия Президенти Владимир Путин, Оқ уйнинг собиқ раҳбари Жо Байден ва Украина Президенти Владимир Зеленский Украинада ҳарбий ҳаракатлар бошланишида айбдор. Бу ҳақда Қўшма Штатлар Президенти Дональд Трамп кеча, 14 апрель куни Oвал кабинетида Сальвадор Президенти Найиб Букеле билан бўлган суҳбатда C-SPAN телеканали берган саволга ана шундай жавоб берди.

Журналист Трампдан Сумига қилинган ҳужумга изоҳ бериб, содир бўлган воқеани хато деб атаганида нимани назарда тутганига ойдинлик киритишни сўради.

“Уруш бошланишига рухсат бериш хато эди”, деди Трамп.

У яна бир бор таъкидлаганидек, агар у уруш бошланиши арафасида Қўшма Штатлар Президенти бўлганида жанглар ҳеч қачон бошланмасди. Унинг фикрича, Байден нефть нархини пасайтиришга эришиш ва шу орқали можаронинг олдини олиш имкониятига эга эди. Трамп ўт очишни тўхтатиши учун Путинга муддат белгилаб берганини айтди.

“Байден ҳам, Зеленский ҳам буни тўхтатиши мумкин эди, Путин эса урушни бошламаслиги керак эди. Буларнинг ҳаммаси айбдор”, деди Оқ уй раҳбари.

north_east

Дунё Россия, Хитой ва АҚШ ўртасида қандай бўлиниши мумкин?

Унинг сўзларига кўра, АҚШ келишув бўйича музокараларда муваффақият қозоняпти ва тез орада “яхши таклифлар”ни кўришини кутмоқда.

Зеленский аввалроқ Украина АҚШдан 15 миллиард долларга 10 та Patriot ҳаво мудофаа тизимини сотиб олишга тайёрлигини маълум қилганди. Унинг сўзларига кўра, европалик ҳамкорлар молиялаштиришда ёрдам беришга тайёр.

“Мен Қўшма Штатларнинг танловини ҳурмат қиламан, аммо Вашингтон бизга бундай тизимларни бермаса ёки уларни сотмаса ҳам биз ҳар қандай форматга тайёрмиз, гап пулда эмас”, деган эди Украина раҳбари.

Эслатиб ўтамиз, жорий йилнинг 11 апрель куни АҚШ Президентининг махсус вакили Стив Уиткофф Россияга борганди. Кремль матбуот котиби Дмитрий Песковга кўра, икки давлат ўртасидаги бундай музокаралар Америка ва Россия раҳбарларига ахборотни “биринчи қўлдан” олиш имконини беради. Кремл вакилининг айтишича, Стив Уиткофф билан музокараларда Владимир Путин ва Дональд Трампнинг эҳтимолий учрашуви батафсил муҳокама қилинмаган.