Трамп Tomahawk’дан фойдаланишни ўрганишга қанча вақт кераклигини айтди

Американинг узоқ масофали Tomahawk қанотли ракеталаридан фойдаланиш бўйича машғулотлар олти ойдан бир йилгача давом этади. Бу ҳақда АҚШ Президенти Дональд Трамп Оқ уйдаги брифингда НАТО бош котиби Марк Рютте билан учрашувда маълум қилди.

“Кўпчилик билмайдиган Tomahawk билан боғлиқ муаммо шундаки, ундан фойдаланишни ўрганиш учун камида олти ой, одатда бир йил керак бўлади. Бу жуда мураккаб қурол. Демак, уни қандай ишлатишни аллақачон билган одамгина, яъни биз уни ишга туширишимиз мумкин ва биз ҳеч кимни қуролни ишлатишга ўргатмоқчи эмасмиз”, деди Трамп.

Президентнинг сўзларига кўра, бу “жуда узоқ келажак” масаласи.

АҚШ Президентининг таъкидлашича, Киев Европа ракеталаридан фойдаланган ҳолда, Америка қуроллари билан Россияга чуқур зарбалар бермаяпти.

“Улар бизнинг ракеталаримиздан фойдаланмайди, Европа ракеталаридан ёки бошқа турдаги ракеталардан фойдаланишади. Лекин улар бизникидан фойдаланишмайди. Улар нима қилса, мен буни назорат қилмайман. Мен фақат ракеталаримизни бошқараман, лекин улар бизнинг ракеталаримизни учиришмайди”, деди Трамп.

Эслатиб ўтамиз, АҚШ Президенти Дональд Трамп 6 октябрь куни журналистлар билан суҳбатида Украинага узоқ масофага учадиган Tomahawk қанотли ракеталарини бериш ёки бермаслик ҳақидаги қарорни деярли қабул қилганини маълум қилганди. Унинг айтишича, агар Россия Украинага қарши агрессив урушни тинч йўл билан тугатишдан бош тортса, Вашингтон Киевга Tomahawk бериши мумкин. “Financial Times”нинг ёзишича, Қўшма Штатлар Украинага 20 дан 50 тагача қанотли Tomahawk ракеталарини тақдим этиши мумкин. 17 октябрь куни Трамп ва Украина Президенти Владимир Зеленский Оқ уйда учрашиб, Украинадаги уруш ва уни тўхтатиш йўлларини муҳокама қилди. Зеленский АҚШ қуролларига катта умид боғлаган эди. У боришидан олдин ҳам, АҚШга етиб борганида ҳам Tomahawk ҳақида жуда кўп гапирди, аммо Трампнинг Путин билан бўлган 2 соатлик суҳбати Зеленский ойлар давомида умид боғлаган қуролдан айирди.