Уруш тинч йўл билан ҳал бўлмаса, Киевга Tomahawk бераман – Трамп

АҚШ Президенти Дональд Трамп Украинага Tomahawk туридаги қанотли ракеталарни бериш имкониятини тилга олди. Унинг айтишича, агар Россия Украинага қарши агрессив урушни тинч йўл билан тугатишдан бош тортса, Вашингтон шундай қадамга бориши мумкин. Бу ҳақда Трамп бугун, 13 октябрга ўтар кечаси Air Force One бортида сўзлади.

Унинг маълум қилишича, ушбу масалани у 11 ва 12 октябрь кунлари Украина Президенти Владимир Зеленский билан муҳокама қилган ва бу чора “янги босқичдаги босим” сифатида кўрилиши мумкинлигини таъкидлаган.

“Эҳтимол, мен россияликлар билан Tomahawk ҳақида гаплашишим керак эди. Улар Tomahawk ўзлари томон учишини хоҳлашади-ми? Менимча, йўқ”, деди Трамп.

Трампнинг қўшимча қилишича, у Россия Президенти Владимир Путинни бундай эҳтимолдан огоҳлантириш ниятида:

“Мен унга шундай дейишим мумкин: “Қара, агар бу уруш ҳал этилмаса, мен уларга Tomahawk юборганим қолади”.

Трампнинг тушунтиришича, агар бундай қарор қабул қилинса, ракеталар бевосита Украинага эмас, балки НАТО давлатларига сотилади – кейин эса улар Киевга беришлари мумкин бўлади.

“Tomahawk – етарли даражада кучли, ҳужумкор қуролдир. Ростини айтсам, Россия бунга муҳтож эмас. Лекин агар тинчликка эришилмаса, биз бунга боришимиз мумкин. Боришимиз шарт эмас, аммо боришимиз мумкин”, деди у.

Украина Президенти Зеленский кеча, 12 октябрь куни “Fox News” телеканалига берган интервьюсида, агар АҚШ Украинага Tomahawk ракеталари берса, улар Россиянинг фуқаролик аҳолисига қарши ишлатилмаслигини таъкидлади:

“Фақат ҳарбий мақсадлар учун. Биз ҳеч қачон уларнинг тинч аҳолисига зарба бермаймиз”, деди Зеленский.

Ўша кунлари у Трамп билан икки кун ичида иккинчи марта суҳбатлашди. “Axios” манбасига кўра, Tomahawk масаласи 11 октябрдаги суҳбатда ҳам кўтарилган. 

“Биз кўряпмизки, Россия америкаликлар бизга Tomahawk бериши мумкинлигидан қўрқмоқда. Бу босим орқали тинчликка эришиш мумкинлигининг белгиси”, деб ёзди ўшанда Зеленский. 

“The Daily Telegraph” маълумотига кўра, сентябрь ойи охирида БМТ Бош Ассамблеяси чоғида Нью-Йоркда Трамп билан ёпиқ учрашувда Зеленский унингдан 1250–2500 км масофага учадиган Tomahawk ракеталарини сўраган.

“Reuters” агентлиги эса бундай етказиб бериш эҳтимолини паст деб баҳолади, чунки АҚШдаги Tomahawk захиралари асосан Денгиз кучлари эҳтиёжи ва бошқа стратегик мақсадлар учун сақланади. Манбалар реал имконият ATACMS каби қисқа масофали ракеталарга кўпроқ тегишли, деган.

“Tomahawk бўйича қарорни деярли қабул қилганман. Лекин билишим керак – улар (украинлар) уларни қаерга йўналтиради? Мен бу ҳақда сўрамасдан туриб, қадам ташламайман. Мен урушни авж олдириш ниятида эмасман”, деди Трамп октябрь бошида журналистлар саволига жавоб бериб.

Россия Президенти Владимир Путин эса эҳтимолий Tomahawk етказиб бериш ҳақида шундай деди:

“Агар Трамп узоқ масофали ракеталарни Украинага беришга қарор қилса, бу Россия ва АҚШ ўртасидаги муносабатларни, айниқса сўнгги пайтда пайдо бўлган ижобий тамойилларни буткул вайрон қилади”.