Трамп Россияга қарши санкцияларни яна бир йилга узайтирди

АҚШ Президенти Дональд Трамп Қримнинг аннексия қилиниши ва ўзини ўзи мустақил деб эълон қилган ДХР ва ЛХРни тан олгани учун Россияга қарши жорий этилган санкцияларни яна бир йилга узайтирди. Бу ҳақда кеча, 27 февраль куни АҚШ Федерал реестри маълумотларида келтирилган.

Шу тариқа Трамп 2014, 2018 ва 2022 йилларда турли АҚШ президентлари томонидан жорий қилинган санкциялар муддатини узайтирган. Ҳужжатда барча чекловлар “2025 йил 6 мартдан кейин ҳам амалда қолиши керак” экани таъкидланган.

“Ушбу фармонларда тилга олинган ҳаракатлар ва сиёсат Қўшма Штатлар миллий хавфсизлиги ва ташқи сиёсати манфаатларига фавқулодда ва ғайритабиий таҳдид бўлиб қолмоқда”, дейилади ҳужжатда.

Маълумот учун, Дональд Трамп 25 февраль куни Россияга қарши санкцияларни бекор қилиш масаласини музокаралар жараёнининг бир қисми сифатида ҳозирча кўриб чиқмаётганини айтди, бироқ “қачондир бу масалани кўриб чиқишимиз мумкин” дея қўшимча қилди. 26 февраль куни эса Трамп журналистлар билан суҳбатда АҚШ Россияга қарши санкцияларни бекор қилишга тайёр бўлишини, бироқ бу фақат Россия-Украина уруши якунлангандан кейин содир бўлишини таъкидлади.

Эслатиб ўтамиз, аввалроқ Буюк Британия Россиянинг Украинага бостириб кирганининг уч йиллиги муносабати билан Россияга нисбатан санкцияларни кенгайтирган эди. 107 банддан иборат янги пакет Россия Қуролли кучлари таъминот занжири, “Путиннинг ноқонуний урушини қўллаб-қувватлайдиган даромадлар” ҳамда Кремлга фойда келтираётган клептократларга қаратилган.