Трамп Молия вазирини Зеленскийнинг олдига юборди

north_east

Трамп яширинча Уиткоффга Россия билан мулоқотни бошлашни топширди – NYT

АҚШ Президенти Дональд Трамп  АҚШ Молия вазири Скотт Бессентни Украинага юборди. Бу ҳақда давлат раҳбари кеча, 11 февраль куни ўзининг Truth Social ижтимоий тармоғида ёзиб қолдирди.

Трампнинг ёзишича, АҚШ Молия вазири Украина Президенти Владимир Зеленский билан учрашиш мақсадида мамлакатга ташриф буюрган.

Трампга кўра, Россия-Украина можароси тез орада тугатилиши керак, чунки бу кўплаб вайронагарчиликлар ва қурбонлар келтирмоқда.

“Украина можароси тугаши керак ва у тез орада тугайди”, дея ёзган у.

АҚШ Президентининг қўшимча қилишича, Вашингтон дунё можароларида миллиардлаб доллар сарфлаб келмоқда.

“Америка кучли бўлса, дунё тинч бўлади”, деган у.

Маълумот учун, Трамп Скотт Бессентни жорий йилнинг 28 январь куни АҚШ Молия вазири лавозимига тайинлаган. 62 ёшли Бессентнинг муҳим сиёсий лавозимларда тажрибаси йўқ – у Key Square Management инвестиция фондини бошқаради. 2011 йилдан 2015 йилгача у магнат Жорж Сорос томонидан асос солинган энг йирик инвестиция бошқарув фондларидан бири – Soros Fund Management'да бош инвестиция директори лавозимида ишлаган.

Эслатиб ўтамиз, аввалроқ Дональд Трамп Россия Федерацияси томонидан ҳарбий тажовузга учраган Украина “бир кун Россияники бўлиб қолиши мумкин”лигини истисно этмаганди. Шунингдек, у Украинанинг табиий ресурслари, хусусан, ноёб тупроқ металлари эвазига Украинага Америка ёрдамини тақдим этиш таклифини такрорлаганди.