Трамп яширинча Уиткоффга Россия билан мулоқотни бошлашни топширди – NYT

АҚШ Президенти Дональд Трампнинг Яқин Шарқ бўйича махсус вакили Стив Уиткоффнинг Россияда қамоқда сақланаётган АҚШ фуқароси Марк Фогелни озод қилиш учун Россияга ташрифи Вашингтон ва Москва ўртасидаги мулоқотнинг янги усулини кўрсатиши мумкин. Уиткоффнинг роли маҳкум америкаликни озод қилиш миссиясидан ташқарида, яъни Россия ва Украина ўртасида тинчлик жараёнини бошлашга ёрдам беришдир. Бу ҳақда кеча, 11 февраль куни вазиятдан хабардор бир неча кишига таяниб, “New York Times” хабар берди.

Газетанинг таъкидлашича, Фогелнинг озод этилиши учинчи давлатлар орқали содир бўлган аввалги агентлар ва маҳбуслар алмашинувидан фарқ қилади: Уиткофф тўғридан тўғри Москвага учиб кетган ва Россия расмийлари билан мулоқот қилган. Бундан ташқари, Москвага ташрифи олдидан Яқин Шарқ бўйича махсус элчи Россия Президенти Владимир Путиннинг яқин иттифоқчилари билан бевосита музокаралар ўтказган.

Шунингдек, Уиткофф Саудия Арабистони ва Қатар вакиллари билан Украинадаги урушни ҳам муҳокама қилган.

Манбага кўра, Дональд Трамп бир неча ҳафта олдин Уиткоффнинг ваколатларини Яқин Шарқ тинчлик жараёни доирасидан ташқарида яширинча кенгайтирган ва истеъфодаги генерал Кейт Келлогг Украина ва Россия бўйича махсус элчи этиб тайинланганига қарамай, унга Россия раҳбарияти билан музокаралар каналини очишни топширган.

NYT'нинг ёзишича, Дональд Трамп ва Стив Уиткофф ўртасида шахсий, ишончли муносабатлар мавжуд: улар 1980 йиллардан бери дўст бўлиб келган, Трамп эса Уиткоффнинг музокаралар олиб бориш маҳорати Украинадаги урушни тугатиш учун етарли, деб ҳисоблайди.

“Шу билан бирга, АҚШ маъмуриятида ушбу масала бўйича аниқ позиция ноаниқлигича қолмоқда”, дейилади мақолада.

Кеча, 11 февраль куни Оқ уй Россия 2021 йилда ҳибсга олинган АҚШ фуқароси Марк Фогелни озод қилганини тасдиқлади.

“Президент Трамп, Стив Уиткофф ва Президент маслаҳатчилари ўзаро алмашиш бўйича музокаралар олиб боришди, бу Россия томонининг яхши нияти ва Украинадаги шафқатсиз ва даҳшатли урушни тўхтатиш учун тўғри йўналишда бораётганлигимиздан далолат беради”, деди АҚШ Президентининг миллий хавфсизлик бўйича маслаҳатчиси Майк Уолтц.

Оқ уйга таяниб, AFP агентлигининг аниқлик киритишича, Уиткофф америкаликни озод қилишда иштирок этган ва баёнот вақтида Фогель билан бирга самолёт бортида “Россия ҳаво ҳудудини тарк этган”.

“Стив Уиткофф сўнгги пайтларда Россияга борган биринчи юқори мартабали америкалик амалдор бўлди”, дея қўшимча қилди агентлик.

Оқ уйнинг ҳисоб-китобларига кўра, АҚШ фуқаросининг озод этилиши Россиянинг Украинадаги урушида ўт очишни тўхтатиш ҳақида хабар бериши мумкин.