Toyota одамсимон робот баскетболчини намойиш этди (видео)

Кеча, 12 апрель куни Toyota Motor компанияси баскетболчи роботнинг янги авлоди – CUE7 ни тақдим этди. Бу модел охирги уч йил ичида илк бор жамоатчиликка кўрсатилди. Бу ҳақда “Nikkei Asia” хабар берди.

Бўйи 219 см бўлган робот ҳаракатланиш учун икки ғилдиракли платформа ҳамда баскетбол тўпини ушлаб туриш ва аниқ йўналтириш имконини берувчи қисқичли манипуляторлар билан жиҳозланган. Оммавий намойиш Токиодаги баскетбол ўйини вақтида бўлиб ўтган ва унда CUE7 тўпни саватга муваффақиятли ташлаган.

Янги моделнинг асосий технологик фарқи – мустаҳкамловчи таълим (reinforcement learning) усулларининг қўлланилишидир: робот тўп отиш техникаси ва у билан ишлашни сунъий интеллект (СИ) алгоритмлари асосида ўзлаштирган. Аввалги авлодларда асосан прогнозли бошқарувга асосланган дастурий моделлардан фойдаланилган.

Муҳандислар қурилманинг конструкциясини ҳам тубдан қайта ишлаб чиққан: тўрт ғилдиракли юритмадан воз кечилиб, икки ғилдиракли платформага ўтилиши ҳаракатчанликни оширган, бўғинлар сонининг оптималлаштирилиши эса вазнни тахминан 40 фоизга – 74 килограммгача камайтириш имконини берган. Toyota баёнотига кўра, CUE7 амалда замонавий СИ ёндашувларига урғу берилган ҳолда қайтадан лойиҳаланган.

Робот лидар ва бир қатор сенсорлар, шунингдек, бош қисмидаги стереоскопик камера билан жиҳозланган. Робот Toyota’нинг пойга автомобиллари ишланмаларидан олинган батареялар ёрдамида ишлайди.

Маълумот учун, CUE лойиҳаси 2017 йилдан бери ривожлантирилмоқда. CUE3 модели 2019 йилда кетма-кет тўп тушириш бўйича рекорд ўрнатган (2020 та гол), CUE6 эса 2024 йилда энг узоқ масофадан аниқ тўп отиш бўйича рекорд ўрнатган (24,55 метр).

Эслатиб ўтамиз, аввалроқ 2028 йилга бориб сунъий интеллектга асосланган хавфсизлик полиция роботлари жиноятчиликка қарши курашда фаол иштирок этишни бошлаши ҳақида хабар берилган эди.